«Օգնիր եղբորդ» քաղաքացիական նախաձեռնությունն այժմ առավել կենտրոնացել է Սիրիայից Հայաստան եկածներին օգնելու աշխատանքների վրա: Նրանց մի մասը բնակվում է Հայաստանի հեռավոր մասերում, շատերը հնարավորություն չեն ունեցել վերադառնալու և մնացել են այստեղ՝ առանց միջոցների, բնակատեղիի և կամ անգամ առանց շորերի, և չենք կարող նրանց թողել ձեռնունայն: Այս մասին Հանրային հեռուստաընկերության «Հարցազրույց» հաղորդման եթերում ասել է «Օգնիր եղբորդ» քաղաքացիական նախաձեռնության համակարգող, ՀՅԴ Բյուրոյի անդամ Վահան Հովհաննիսյանը:
«Մերձավոր Արևելքի գաղութների պահպանումը մեզ համար ստրատեգիական նպատակ է, բայց իրավիճակը (ոչ պակաս Թուրքիայի դրդումով), այլ վիճակ է պարտադրում Լիբանանում, Իրանում, Իրաքում, Սիրիայում, և չենք կարող ասել, որ` չէ, պետք է մնալ: Բայց եթե հայությունը դուրս գա այնտեղից, պետք է գա այստեղ: Բայց որ եկավ, պետության համար զանազան հարցեր են առաջանում: Դրա համար այստեղ էլ քաղաքացիական նախաձեռնությունը կարևոր դեր կարող է խաղալ»,- նշել է Վահան Հովհաննիսյանը և հավելել. «Եթե իդեալական տարբերակի մասին խոսենք, կարևոր է, որ Սիրիայում պատերազմը ավարտվի, խաղաղություն հաստատվի, և մարդիկ վերադառնան այնտեղ` հայերը, ուրիշ քրիստոնյաները և բոլոր փախստականները: Բայց դա քիչ հավանական տարբերակ է: Այս առումով մենք պետք է Հայաստանը պատրաստենք փախստականների հնարավոր նոր ալիքին»:
Վ. Հովհաննիսյանի խոսքերով՝ քաղաքական առումով Հայաստանի քայլերը վտանգ չեն կարող ներկայացնել. «Մինչ այս պահը գործել ենք ոսկերչական զգուշավորությամբ: Նույնիսկ փորձել ենք արաբական մամուլում` ոչ Սիրիայում, ցույց տալ, թե տեսեք` հայերը հայերին են օգնում: Բայց այլ արաբական թերթեր հակադարձեցին, որ՝ ոչ, բոլորին են օգնում: Մենք միշտ աշխատել ենք այնպես, որ որևէ մեկը չկարողանա հայերին դարձնել օղակ` իր խնդիրները լուծելու համար»:
Սիրիան, Վահան Հովհաննիսյանի կարծիքով, որպես իսլամական Արևելքի կարևոր սյուներից մեկը, փշրվում, կործանվում է: «Այն, որ Սիրիայի ներսում վաղուց հասունացել էր ներքին հասարակական լարումը, այս վիճակին բերեց»,- ասել է բանախոսը: Ծոցում, ըստ նրա, շատ ավելի դիկտատորական երկրներ կան: Այս առումով Սիրիան ժողովրդավար օազիս էր տարածաշրջանում, ինչը կործանելու համար էլ որոշ պետություններ գնացին այս քայլին: «Թե ինչով կվերջանա՝ չգիտեմ, բայց փաստ է, որ Սիրիան երկար ժամանակ չի կարողանա կայունության հասնել: Եթե դրսի ուժեղ միջամտություն չլինի, Սիրիան ունի պոտենցիալ՝ կարգուկանոն հաստատելու»,- ասել է ՀՅԴ Բյուրոյի անդամը: Թուրքիայի կողմից Սիրիա ներխուժումը Վահան Հովհաննիսյանը հնարավոր չի համարում, միաժամանակ նշում է, որ Թուրքիան «զրո պրոբլեմ հարևանների հետ» նախագիծը մշակելով՝ հասկացել է «զրո հարևան», և այդպես էլ վարվում է:
