Այսօր Մարտի 1-ի գործով ԱԺ-ում նոր ժամանակավոր հնարավոր հանձնաժողովի գործառույթների մասին են խոսել ՀԱԿ խմբակցության պատգամավորներն ու 2008 թ. Մարտի 1-ի զոհերի հարազատներից ոմանք: ԱԺ-ում այս նախագիծը շրջանառության մեջ մտցրած պատգամավորներն ասել են, թե ինչով է նոր հանձնաժողովը տարբերվելու Նիկոյանի հանձնաժողովից: «Առաջին լրատվական»-ի հետ զրույցում այս մասին տեղեկացրեց Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը:
Նա նկատեց, որ Նիկոյանի հանձնաժողովից նոր հանձնաժողովը տարբերվելու է, քանի որ այլ խնդիրներ է դրել իր առաջ: Ըստ նրա՝ ԱԺ-ում Մարտի 1-ի գործով նոր հանձնաժողովի հիմնական գործառույթը լինելու է Մարտի 1-ին ՀՀ ոստիկանության աշխատակիցների, Հատուկ քննչական ծառայության, Դատախազության ձեռնարկած գործողությունների օրինականությունը և հիմնավորվածությունը քննելը:
«Նիկոյանի հանձնաժողովը իբր պետք է սպանությունների կոնկրետ դեպքերն ուսումնասիրեր, որը չարեց, իսկ այս հանձնաժողովի օրակարգը շատ ավելի լայն է: Հանձնաժողովն ուսումնասիրելու է նաև չորս բանաձևերը, որոնք ընդունվել են ԵԽԽՎ-ի կողմից։ Ուսումնասիրվելու է՝ դրանք կատարվել են, թե՝ ոչ, որը Նիկոյանի հանձնաժողովի դեպքում չկար: Նաև ուսումնասիրվելու է, թե ինչքանով է անցյալ տարի ՀՀ գլխավոր դատախազությանն ուղղված ՀՀ նախագահի հանձնարարականը նոր թափ հաղորդել Մարտի 1-ի բացահայտմանը»,- նշեց Ալլա Հովհաննիսյանը՝ զուգահեռաբար կասկածելով, որ հանձնաժողովի ստեղծմանը կողմ կքվեարկի ԱԺ-ում գործող Հանրապետական մեծամասնությունը: Ուստի, նրա համոզմամբ, այս դեպքում պետք է օգտագործել ամեն հնարավորություն, որով կարելի է Մարտի 1-ի մասին բարձրաձայնել: Նա նշեց, որ զոհերի հարազատների կողմից այդ քայլերը ողջունելի են:
«Եթե Հանրապետականը չի ցանկանում ամբողջ պատասխանատվությունն իր վրա վերցնել, կարծում եմ՝ իրենք ևս պետք է «կողմ» քվեարկեն հանձնաժողովի ստեղծմանը: Իսկ եթե «դեմ» քվեարկեն (ոչ միայն Հանրապետական կուսակցությանն է վերաբերում), ապա պատասխանատվությունը կկիսվի այն կուսակացության հետ, ով դեմ է հանձնաժողովին: Մենք դեռ առաջարկներ չենք ներկայացրել, այսօր շատ կարճ հանդիպում է տեղի ունեցել, բայց մյուս շաբաթվա մեջ կհանդիպենք պատգամավորների հետ և այդ առաջարկները կներկայացնենք»,- եզրափակեց իր խոսքն Ալլա Հովհաննիսյանը:
Հիշեցնենք, որ ՀԱԿ-ն ԱԺ-ում շրջանառության մեջ էր դրել «2008 թ. Մարտի 1-2-ը Երևան քաղաքում տասը անձանց սպանությունների, քաղաքացիական անձանց, ոստիկանության աշխատակիցներին ու զինծառայողներին հրազենային ու այլ մարմնական վնասվածքներ պատճառելու դեպքերով ՀՀ ոստիկանության, Հատուկ քննչական ծառայության, ՀՀ գլխավոր դատախազության ձեռնարկած միջոցառումների ու գործողությունների հիմնավորվածության և օրինականության հարցը ուսումնասիրող ՀՀ Ազգային ժողովի ժամանակավոր հանձնաժողով ստեղծելու մասին» որոշման նախագիծ: ԱԺ իրավաբանական վարչությունը փորձաքննության էր ենթարկել և դրական եզրակացություն տվել ՀԱԿ–ի առաջարկած նախագծին։ Սակայն այն դեռ չի ներառվել ԱԺ քառօրյա նիստերի օրակարգում:
