Վերջին օրերին «Հըզբոլլահը» Գազայի հատված է փոխադրել իր հրթիռային զինանոցի մի մասը, այդ թվում՝ հեռահարության մեծ շառավող հրթիռների վիթխարի քանակություն: Ինչպես հաստատում է լիբանանյան «Ալ-Ակբար» թերթը, որը կապեր ունի շիայական ահաբեկչական խմբավորման հետ, Գազայի հատվածում օպերացիայի սկսվելուց անմիջապես հետո «Հըզբոլլահի» և ՀԱՄԱՍ-ի ղեկավարությունները համատեղ գործողությունների համակարգման ուղիներ են սահմանել: Լիբանանյան խմբավորման գրոհայիններն ու Իրանի իսլամական հեղափոխության պահակազորի ուժերը բերվել են մարտական պատրաստության բարձր աստիճանի:
Պատրաստության բարձր աստիճանի են բերվել Իրանից Լիբանան և Գազայի հատված զենքի մատակարարման ճանապարհին ընկած «կայանների» անձնակազմերը: Առաջին հերթին դա վերաբերում է Սուդանի և Սինայի թերակղզում գործող գործակալներին: Պարբերականի տեղեկություններով՝ Թեհրանում չեն հավատում կրակի շուտափույթ դադարեցմանը:
Լիբանանյան ԶԼՄ-ները նաև հաղորդում են, որ ՀԱՄԱՍ-ին ուղղված սպառազինության ժամանակակից համակարգերի մատակարարումներին մասնակից է նաև Սիրիան, մասնավորապես Բաշար Ասադի ռեժիմը Գազայի հատված է ուղարկել «Գռադ» հրթիռներ և ռուսական «Կորնետ» հակատանկային համալիրներ:
