Լատինական Ամերիկայի երկրները կարող են ճգնաժամից դուրս գալու հարցում օգնել ոչ միայն Իսպանիային և Պորտուգալիային, այլև ողջ ԵՄ-ին: Նման եզրակացության են եկել Իբերաամերիկյան XXII գագաթնաժողովի մասնակիցները: Գագաթնաժողովն իր աշխատանքն ավարտել է շաբաթ, Կադիսում (Պիրենեյան թագավորության հարավ-արևմուտք): Այս մասին հայտնում է ITAR-TASS-ը:
«XXI դարում միջազգային հանրության առջև ծառացած խնդիրները լուծում են պահանջում, որոնց մշակմանը պետք է մասնակցի իբերաամերիկյան հասարակությունը, որի ներուժը բավարար է Եվրոպայում տնտեսական ճգնաժամի հաղթահարման համար»,- նշել է Իսպանիայի վարչապետ Մարիանո Ռախոյ Բրեյը:
Ներկայում Իսպանիայի և Պորտուգալիայի տնտեսություններն ընկղմված են խոր ճգնաժամի մեջ, մինչդեռ Հարավային և Կենտրոնական Ամերիկայի երկրները տնտեսապես աճում են: Այդ աճը 2013-ին կարող է հասնել 4 տոկոսի: Այդ իսկ պատճառով հանդիպման եվրոպացի մասնակիցները հատուկ հետաքրքրություն են ցուցաբերել նրանց հետ տնտեսական համագործակցության ուժեղացման շուրջ:
Մարիանո Ռախոյը լատինաամերիկյան երկրներին կոչ է արել մեծացնել ներկայությունը Հին աշխարհում: «Այսօր մենք, ինչպես երբևէ, բաց ենք Լատինական Ամերիկայի համար»,- ասել է նա:
Նման շեշտադրումով է հանադես եկել նաև գագաթնաժողովին որպես դիտորդ ներկա Եվրահանձնաժողովի ղեկավար Ժոզե Մանուել Բառոզուն. «Չնայած ոչ այնքան բարենպաստ տնտեսական իրադրությանը, ԵՄ-ն մնում է Լատինական Ամերիկայի խոշորագույն գործընկերներից մեկը»:
Պորտուգալիայի նախագահ Անիբալ Կավակու Սիլվան իբերաամերիկյան համագործակցությունը գնահատել է որպես «ներդրում ապագայում»:
Լատինական Ամերիկայի երկրների և կառավարությունների ղեկավարները խոսել են նաև փոքր և միջին բիզնեսի աջակցման և աշխատուժի մասնագիտական հնարավորությունների բարձրացման անհրաժեշտության մասին:
Բազմակողմ հանդիպումն ավարտվել է Կադիսի հռչակագրի ստորագրմամբ, որում իբերաամերիկյան պետություները պարտավորվել են իրականացնել նոր աշխատատեղերի ստեղծման, տարածաշրջանային շուկաների հնարավորությունների ընդլայնման, փոքր և միջին բիզնես աջակցման, ենթակառուցվածքի, հեռահաղորդակցության, էներգետիկ և ջրային ռեսուրսների զարգացման քաղաքականություն: Բացի այդ, մասնակիցները հանդես են եկել ՄԱԿ-ի ԱԽ-ում Իսպանիայի անդամակցության թեկնածության աջակցմամբ:
Իբերաամերիկյան գագաթնաժողովն առաջին անգամ անցկացվել է Իսպանիայի տարածքում: Այն նվիրված էր Կադիսի սահամանդրության 200-ամյակին, որը օրինակ է ծառայել բազմաթիվ երկրների սահամանդրությունների ստեղծման համար:
Միջոցառմանը մասնակցել են Հարավային և Կենտրոնական Ամերիկայի 22 երկրներ, ինչպես նաև Իսպանիան, Պորտուգալիան և Անդորրան:
