«Առանձին-առանձին, ինքնագոհ, դասական քաղաքական պայքարով ընթանալը նշանակելու է հերթական հիասթափություն, կործանման խորացում»,- Ազատության հրապարակում լրագրողների հետ հանդիպման ժամանակ այսօր հայտարարեց «Ժառանգություն» կուսակցության հիմնադիր, հացադուլի մեջ գտնվող Րաֆֆի Հովհաննիսյանը` հավելելով. «Արտակարգ լուծումները պետք է լինեն հիմա»։
«Եթե մենք թույլ տանք, որ մտնենք սովորական ընտրական շրջան` առանց որևէ բեկումնային փոփոխության, դա նշանակելու է, որ կա՛մ կանխորոշված է լինելու այդ ընտրական գործընթացը, այսինքն` ֆատալիզմը, ճակատագրապաշտությունն է այցելելու մեր ժողովրդին, ինչը կործանարար է, կա՛մ էլ այդ պայթյունը, որը հիմա կարող է տեղի ունենալ, բայց մենք շոգին բաց ենք թողնում, հետաձգվում է, ահավոր վտանգավոր պայթյուն է մեզ սպասվում հաջորդ տարիների ընթացքում: Մենք բոլորս դա պետք է կանխենք և այս անցման շրջանը սահմանադրական, համալիր լուծումներով առաջնորդենք»,- ասաց «Ժառանգության» վարչության նախագահը:
