Երեկ տեղի ունեցած աննախադեպ մրրիկը, իսկ երկու օր առաջ էլ տեղացած կարկուտն Արարատի մարզում 40 տոկոսով ավերել է ձմերուկի, սեխի, վարունգի, եգիպտացորենի ցանքատարածությունները: Երեկվա մրրիկից տուժել են Արարատի մարզի մի շարք գյուղեր, փլուզվել՝ տանիքներ: Աննախադեպ մրրիկի պատճառով երեկ տուժել է նաև Նոր Խարբերդի թիվ 1 միջնակարգ դպրոցը: Ամբողջությամբ պոկվել է դպրոցի նոր մասնաշենքի տանիքը:
Դպրոցի տնօրեն Մարինե Սարգսյանը «Առաջին լրատվական»-ին պատմեց, որ ժամը 19:30-ին սկսված մրրիկն աննախադեպ էր, կատարվածը՝ անսպասելի: Դպրոցը հիմնովին վերանորոգվել է 2006 թվականին: «Լավ է, որ այդ ժամանակ դպրոցի տարածքում մարդ չի եղել, քանի որ մարդիկ սովորաբար այստեղ այդ ժամերին զբոսնում են»,- ասաց տնօրենը՝ հավելելով. «Այս մեկ ամսվա ընթացքում սպասվում են անձրևներ, ես չգիտեմ՝ ինչ է լինելու»:
Դպրոցի տնտեսվարն էլ պատմեց, որ տանիքը պոկվել-ընկել է այնպիսի ուժգնությամբ, որ ամբողջ գյուղը շտապել է դպրոց: Տնօրենի խոսքով՝ կարծիք կա, որ գուցե տանիքը ժամանակին լավ ամրացված չի եղել, իսկ մնացածը թողնում է փորձագետներին:
Տանիքն ուժգնությամբ ընկել է դպրոցի մերձակայքի ծառերի վրա՝ արմատախիլ անելով դրանք:
Մարզպետը, գյուղապետը արդեն այցելել են դպրոց, ծանոթացել խնդրին:
Նոր Խարբերդ համայնքի ղեկավար Կամո Կակոյանն «Առաջին լրատվական»-ի հետ զրույցում նշեց, որ փորձում են լուծումներ գտնել. «Մի մասը կախված է մարզպետից, մի մասը՝ համայնքից: Մարզպետն ասաց՝ տեսնենք, թե ինչպես է կառավարության հետ խնդիրը լուծելու, մի գյուղ չի, որ մարզպետը մտածի՝ մարզում հրատապ լուծման կարիք ունեցող ինը այսպիսի դեպք կա»,- հավելեց Կամո Կակոյանը:
«Կարծեցի՝ երկրաշարժ ա, վազեցի դուրս, տեսա՝ կռիշն ա»,- պատմեց դպրոցի պահակ Գուրգեն պապը: