Տրանսպորտի և կապի փոխնախարար Արթուր Առաքելյանը հունիսի 9-ին ԱԺ-ում ՀՀ և Եվրոպական ներդրումային բանկի միջև 2013-ի նոյեմբերի 7-ին և 2013-ի նոյեմբերի 18-ին ստորագրված «ՀՀ «Հյուսիս- Հարավ» ճանապարհային միջանցք» ֆինանսական պայմանագրի քննարկման ժամանակ անդրադարձավ 60 մլն եվրո վարկին:
«Ասել, որ այս վարկն աշխատում է արդեն իսկ մեր տնտեսության վրա… մենք հիմա համապատասխան հաշվարկներ ենք կազմակերպել: 2016-ին խնդիր ունենք հայկական հումքի՝ արդեն սակավ լինելու իմաստով, օրինակ՝ 2015-ի ավարտին, 2016-ի սկզբին Արարատցեմենտը երևի արդեն չհասցնի ամբողջ ծավալով ցեմենտ տալ: Որպես տնտեսության խթանման միջոց՝ ուզում ենք առաջարկել, որ դիտարկվեն այլ կարողությունների զարգացման հնարավորություններ»,- ասաց նա:
Առաքելյանի խոսքով՝ սա, ըստ էության, Հայաստանի առաջին հայտն է՝ դառնալ տարանցիկ երկիր և դուրս գալ տարածաշրջանային պրոյեկտներից դուրս մնալու հնարավորությունից, պարսկական և ասիական բոլոր բեռնափոխադրողներին առաջարկել օգտվել այս ճանապարհից: «Չեմ կարծում, որ կարելի է քննարկման առարկա դարձնել այս ճանապարհահատվածի կառուցման նպատակահարմարությունը: Տրանսպորտի և կապի նախարարությունն այս պահին աշխատում է լուրջ բիզնես – ծրագրի առաջարկի ուղղությամբ, որ լեռնային գոտու բարդ հատվածներում թունելների կառուցման մեջ մասնավոր ներդրողների գրավի»,- ասաց նա:
