Ռուսական ընկերությունները պատրաստվում են պայմանագրեր կնքել յուանով և ասիական այլ արժույթներով այն մտավախությունների ֆոնին, որ արևմտյան պատժամիջոցները կարող են իրենց դուրս մղել դոլարային շուկայից, գրում է CNBC-ն:
«Վերջին մի քանի շաբաթներին շուկայում մեծ հետաքրքրություն է նկատվում ռուսական խոշոր կորպորացիաների կողմից յուանի և ասիական այլ արժույթների, նաև Ասիայում հաշիվներ բացելու նկատմամբ»,- Financial Times-ին տված հարցազրույցում հայտնել է Ռուսաստանում Deutsche Bank-ի գլխավոր գործադիր տնօրեն Պավել Տեպլուխինը:
ՎՏԲ բանկի վարչության նախագահ Անդրեյ Կոստինը ևս հայտարարել է, որ ոչ դոլարային արժույթների օգտագործման ընդլայնումը բանկի հիմնական առաջադրանքներից է:
Ռուսական ընկերության ղեկավարը հայտնել է, որ իր ընկերությունն արդեն հիմք է դրել հետագա պատժամիջոցների դեպքում այլ արժույթներով հաշիվների անցնելու համար: «Եթե ինչ-որ բան տեղի ունենա, մենք պատրաստ ենք անցնել այլ արժույթների, օրինակ՝ չինական յուանի կամ հոնկոնգյան դոլարի»,- ասել է բիզնեսմենը:
«Գազպրոմ նավթի» գլխավոր տնօրեն Ալեքսանդր Դյուկովը նշել է, որ ընկերությունը սպառողների հետ քննարկում է պայմանագրերը դոլարայինից այլ արժույթների փոխելու հնարավորությունը:
«Նորիլսկի նիկել» ընկերությունը ևս երակարաժամկետ պայմանագրերը յուանով արտահայտելու հնարավորության վերաբերյալ բանակցել է չինացի սպառողների հետ:
Ռուսական տնտեսության մեջ, սակայն, դոլարից լրիվ հրաժարում չի նախատեսվում, CNBC-ը բերում է ՌԴ նախագահի օգնական Անդրեյ Բելոուսովի խոսքը. «Ռուսաստանն առայժմ չի ենթարկվում համակարգային պատժամիջոցների, որոնք կարող էին հանգեցնել դոլարին մեր տնտեսության հասանելության արհեստական սահմանափակման,… չեմ կարծում, թե մինչ այդ Ռուսաստանն արհեստական «ապադոլարացման» քայլեր ձեռնարկի»:
