Կիևի իշխանափոխությանը զուգահեռ՝ Կիևում նախատեսվում է նաև տեղի հայ համայնքի ղեկավարության փոփոխություն: Վերջերս իր հրաժարականն է ներկայացրել Կիևի հայ համայնքի ղեկավարը, ուստի հունիսի 19-ին անցկացվելու են համայնքի ղեկավարության՝ համայնքի ղեկավարի և վարչական մարմնի հերթական ընտրությունները: «Առաջին լրատվական»-ի հետ զրույցումՈւկրաինայի Հայոց թեմի առաջնորդ Տ. Գրիգորիս արքեպիսկոպոս Բունիաթյանն ասաց, որ թեկնածուները, որոնց ցուցակը դեռ ամբողջացած չէ, հայ համայնքում նախկինում աշխատած հեղինակավոր անձինք են, նոր մարդիկ չեն:
«Համայնքի ղեկավարերը պետք է կապեր հաստատեն տեղական ղեկավարների հետ, դրա համար պետք է լինեն այնպիսի անձնավորություններ, որոնք ունեն այդ կապերը գործի բերումով կամ իրենց հեղինակությամբ: Այդպիսի մարդիկ կան, ուստի պետք է սպասել, որպեսզի առաջադրումներն ավարտվեն»,- ասաց Գրիգորիս սրբազանը:
«Առաջին լրատվական»-ի հետ զրույցում Կիևում բնակվող հայ գեղանկարիչ Բորիս Եղիազարյանն ասաց, որ այս փոփոխությունն անհրաժեշտ է Կիևի նոր իշխանությունների ու հայ համայնքի միջև կապեր հաստատելու և դրանք ամրապնդելու համար, քանի որ համայնքի նախկին իշխանությունը, որը սերտ կապեր ուներ Յանուկովիչի իշխանության հետ, չէր կարող շարունակել արդեն գործող իշխանության հետ:
«Շատ կիրթ մարդիկ կան հայ համայնքում, որոնք կարող են աշխատել նոր իշխանությունների հետ, շատ արժանավոր անձինք, որոնք վերջին մի քանի տարվա ընթացքում չեն եղել համայնքի ղեկավարության կազմում, բայց եղել են մարզերում, նախկին հայերի միության կազմում: Հայ համայնքը պետք է կազմակերպվի՝ որպես համայնք, ու կարծում եմ, որ պետք է ուսումնասիրվի այլ երկրներում հայ համայնքի կառուցվածքն ու գործունեությունը, և փոքր-ինչ փոխվի մեր հայ համայնքի ձևը, պետք է վերջ տալ հայերի միություններին, որոնք նման են կուսակցությունների, և որի նախատիպը կա Ռուսաստանում, հայ համայնքը պետք է ներկայացված լինի Ուկրաինայում իր բոլոր տեսակներով»,- ասաց Բորիս Եղիազարյանը:
