Հայկական աստղագիտական ընկերության համանախագահ Արեգ Միքայելյանը, խոսելով Հայաստանի աստղագիտության զարգացման միտումներից և հեռանկարներից, նշեց, որ խնդրին երկու ձևով պետք է պատասխանել. կա և՛ լավը, և՛ վատը:
Նրա խոսքով`Հայաստանը ունի բավական բարձր մակարդակի աստղագիտություն, մյուս կողմից՝ հիմա ցավալի վիճակ է ենթակառուցվածքների առումով, միջոցներ չեն ներդրվում, և մեր աստղագետներն իրենց ֆինանսներով են կարողանում զարգացնել աստղագիտությունը:
Նա նշեց, որ խորհրդային տարիներին Հայաստանը Միությունում և աշխարհում աստղագիտության ոլորտում առաջատար էր, ներկայումս տարածաշրջանում է լավագույնը: Բացի այդ, Մերձավոր Արևելքում Հայաստանը տարածաշրջանային աստղագիտական կենտրոն դառնալու հավակնություն ունի, ներկայացրել է հայտեր, մեկ տարուց ավելի է՝ ընթանում են քննարկումները, և եթե ընտրվի, ապա տասը տարով երկիրը այդպիսի ստատուս կստանա:
Խոսելով Բյուրականի աստղադիտարանից` Արեգ Միքայելյանը նշեց, որ այստեղ էլ կան նույն խնդիրները, որոնք առկա են մյուս գիտական ոլորտներում:
«Պետության կողմից գիտության նկատմամբ լուրջ մոտեցում չկա, ավելին՝ անպատասխանատու մոտեցում է»,- ասաց նա` հավելելով, որ 20 տարի շարունակ Հայաստանը զիջում է, իհարկե, կրիտիկական սահմանը չի անցնել, եթե այդ սահմանից ներքև անցնի, գուցե հնարավոր չլինի վերականգնել:
Նա նաև նշեց, որ եթե իրենց սերունդը հեռանա գիտությունից, երիտասարդներն այնքան ուժեղ չեն, որ վերցնեն իրենց ձեռքը, նրանք դեռ պետք է աճեն, երիտասարդները դժվար են գալիս աստղադիտարան:
Նա օրինակ բերեց, որ այս տարի համաշխարհային օլիմպադիայից աստղագիտությունից մեկ ոսկե, մեկ արծաթե և մեկ բրոնզե մեդալ բերեցին, բայց նույն այդ պատանիները չեն ձգտում դեպի աստղագիտություն, ձգտում են ավելի պրագմատիկ ոլորտներ, որոնք հնարավորություն կտան ընտանիք պահել: Ըստ նրա` մեր երկրում չի գնահատվում դրա կարևորությունը:
Գիտության նկատմամբ լուրջ վերաբերմունք են ցուցաբերում զարգացած երկրները:
