«Չեմ կարծում, որ դա մեզ համար նորություն է: Ռուսաստանն ունի իր հարաբերությունները բոլոր կողմերի հետ, անկախ այն հանգամանքից, թե երրորդ կողմի հետ ինչ հարաբերություններ ունի»,- լրագրողների հետ զրույցում ասաց ԱԺ Դաշնակցություն խմբակցության ղեկավար Արմեն Ռուստամյանը՝ անդրադառնալուվ ռուսական կողմի հայտարարությանը՝ «Ադբեջանը մեր ռազմավարական գործընկերն է»:
Հիշեցնենք, որ նախօրեին Ռուասատնի ԱԳՆ մամուլի խոսնակ Ալեքսանդր Լուկաշևիչն այսպիսի հայտարարություն էր արել. «Ադրբեջանը մեր ռազմավարական գործընկերն է Հարավային Կովկասում: 2013 թ. երկու երկրների միջև առևտրային շրջանառությունը կազմել է 3.5 մլրդ ԱՄՆ դոլար: Դա 4 տոկոսով ավելի է, քան 2012 թ.: Ռուսաստանի արտահանման ծավալը կազմել է 3 մլրդ, ներմուծմանը՝ 640 մլն դոլար: Ադրբեջանում գործում է ավելի քան 500 ռուսական ընկերություն»,- ասել է Լուկաշևիչը՝ հավելելով, որ հունիսի 17-18-ը Ռուսաստանի արտգործնախարարը կմեկնի Բաքու»:
Ինչպես հայտնի է, Ռուսաստանը նաև Հայաստանի ռազմավարական գործընկերն է: Նման պարագայում մեր երկրի համար մտահոգիչ չէ՞ այն հանգամանքը, որ մեր ռազմավարական գործընկեր ՌԴ-ն միաժամանակ ռազմավարական գործընկեր է մեր հակառակորդ Ադրբեջանի հետ: «Դա մեզ համար նորություն չէ: Եվ սա մենք միշտ արձանագրել ենք՝ կապված զենքերի վաճառքի և այլ խնդիրների հետ: Բնականաբար, ՌԴ-ն պետք է հարգի նաև այն կողմերի հետ ունեցած համաձայնությունները, որոնք մինչև հիմա ձեռք են բերվել: Սակայն բոլոր այդպիսի դեպքերում նա մի բան է պնդում, թե որևէ մեկի հետ համաձայնությունը կամ պայմանավորվածությունները, ռազմավարական հարաբերությունները ուղղված չեն երրորդ կողմի դեմ»,- պատասխանեց Ա. Ռուստամյանը:
Բայց նման պարագայում Հայաստանը վտանգավոր իրավիճակում չի՞ հայտնվում: «Հայաստանը միշտ է ծանր վիճակում, Հայաստանը նոր չէ, որ այս տարածաշրջանում է և ունի բազմաթիվ խնդիրներ, չլուծված հակամարտություն: Այս հարցերը, բնականաբար միշտ էլ պետք է մեր օրակարգում լինեն, և մենք պետք է հասկանանք, որ մեզ համար անվտանգության խնդիրները առաջնային են: Մեր խնդիրն է, որ կարողանանք պատրաստված լինել աշխարհաքաղաքական հարթությունում տեղի ունեցող զարգացումներին: Եվ այն, ինչ կատարվում է վերջին շրջանում, ևս մեկ անգամ ապացուցում է, որ մենք պետք է ունենանք մեր արտաքին քաղաքականության դոկտրինը, արտաքին քաղաքականության հիմնական ուղղությունները, ինչը դժբախտաբար չի երևում: Մենք շատ կրավորական, զգուշավոր պահվածք ենք ունեցել մինչև հիմա: Եվ այնպես ենք վարվել, որ հանկարծ մի բան չանենք, որը կարող է մյուսին դուր չգալ»,- ավելացրեց Ա. Ռուստամյանը:
