ԱԺ տնտեսական հարցերով մշտական հանձնաժողովն այսօր քննարկեց և դրական եզրակացություն տվեց պատգամավորներ Էդմոն Մարուքյանի և Ալեքսանդր Արզումանյանի ներկայացրած՝ «Շահումով խաղերի մասին» օրենքում փոփոխություններ կատարելու մասին նախագծին:
Հեղինակներն իրենց նախաձեռնությամբ առաջարկում էին այնպիսի մեխանիզմ մտցնել, որ խաղատների հաճախորդը կարողանա ինքնակամ արգելք դնել իր վրա, այսինքն՝ ներկայանա պատկան մարմնին և խնդրի 3 կամ 6 ամիս ժամկետով իր մուտքը սահմանափակել խաղատուն: Իսկ խաղատներն էլ պետք է հաճախորդներին ներս թողնելիս ստուգեն նրանց անձնագրերը: Եթե այդ անձնագրի տվյալներն ստուգելիս պարզվի, որ արգելք կա, չպետք է ներս թողնեն խաղատուն: Հեղինակներն այդպիսով ցանկանում են որոշակի ինքնակարգավորման կամ վերահսկողական գործառույթներ սահմանել խաղատների ու հատկապես խաղամոլների համար, որպեսզի վերջիններս կարողանան զսպել շահումով խաղերի նկատմամբ իրենց մոլուցքն ու տանուլ չտալ ողջ կարողությունը:
Տնտեսական հարցերով մշտական հանձնաժողովի անդամներ Արման Սահակյանն ու Գարեգին Նուշիկյանը կողմ արտահայտվեցին այդ օրինագծին: Նրանք կարծում են, որ խաղատներ հաճախելու հետ կապված եվրոպական երկրներում գործող այդ արգելքի կամ ինքնարգելքի մեխանիզմը պետք է ներդրվի նաև Հայաստանում: Ի դեպ, Ա. Սահակյանն ու Գ. Նուշիկյանը «Առաջին լրատվական»-ի հետ զրույցում ասացին, որ իրենք հաճախել են կազինո, բայց ոչ՝ Հայաստանում. Ա. Սահակյանը եղել է Լաս Վեգասի և Մոնտե Կառլոյի կազինոներում, իսկ Գ. Նուշիկյանը՝ Մոնակոյում:
