Պաղեստինն աջակցություն է խնդրել Չմիավորման շարժման անդամ երկրներից մի շարք միջազգային կազմակերպությունների ու կառույցների անդամակցելու հարցում: Այս մասին հայտարարել է Պաղեստինի արտգործնախարար Ռիյադ Ալ-Մալիկին, ով մասնակցում է Չմիավորման շարժման 17-րդ նախարարական համաժողովի աշխատանքին, որն անցկացվում է Ալժիրի մայրաքաղաքի Ազգերի պալատում: Այս մասին հայտնում է ITAR-TASS-ը:
Ալ-Մալիկին հիշեցրել է, որ 2012-ի նոյեմբերին ՄԱԿ-ի Գլխավոր ասամբլեան հավանություն է տվել Պաղեստինին ՄԱԿ-ի դիտորդ-պետության կարգավիճակ տրամադրելու բանաձևին: Այդ կարգավիճակը, նշել է նա, հասանելիություն է բացում դեպի տարբեր միջազգային համաձայնագրեր և կազմակերպություններ:
Նախարարը միջազգային հանրության ուշադրությունը կենտրոնացրել է «արմատական տրամադրություններով հրեա բնակիչների խմբերի ագրեսիվ գործողությունների խնդրին, ովքեր Իսրայելի կառավարության աջակցութամբ հարձակումներ են կատարում պաղեստինցիների վրա»: Ալ-Մալիկին դատապարտել է Իսրայելի կողմից Երուսաղեմի օկուպացիան և հրեական պետությանը նախազգուշացրել Ալ-Ակսա (մուսուլմանների համար նշանակությամբ երրորդ սրբավայրն է՝ Մեքքայից և Մադինայից հետո) տիրելու փորձերի վերաբերյալ:
Ֆորումի ծրագրում ներառված է ահաբեկչության և անդրսահմանային հանցավորության, զենքի շրջանառության, անօրինական միգրացիայի, ինչպես նաև Եվրոպայում իսլամաֆոբիայի խնդիրների քննարկումը: