ՆԱՏՕ-ն ընդունում է, որ Ռուսաստանն Ուկրաինայի հետ սահմանից արդեն հեռացրել է իր զորքերի մի մասը՝ չնայած տասնյակ հազարավոր ռուս զինծառայողներ մնում են իրենց նախկին դիրքերում՝ Reuters-ին հայտնել է հյուսիսատլանտյան դաշինքում աղբյուրը:
«Միավորումների մի մասը հեռացվել է սահմանից: Ակտիվությունը, որը մենք նկատում ենք, թույլ է տալիս ենթադրել, որ զորքերի դանդաղ հեռացումը շարունակվում է: Ներկայում սահմանի մոտ ավելի վաղ տեղակայված զինծառայողների մեծ մասը մնում են այնտեղ և ունակ են կարճ ժամանակում ծավալվել: Հազարավորների հեռացրել են, բայց տասնյակ հազարավորներ մնում են»,- գործակալությանն անանունության պայմանով ասել է աղբյուրը:
Ռուսաստանի նախագահ Վլադիմիր Պուտինը դեռ երկու շաբաթ առաջ հայտարարել էր, որ ռուսական զորքերը հրաման են ստացել Ուկրաինայի հետ սահմանից վերադառնալ դեպի իրենց մշտական տեղակայման վայրեր:
Սակայն երկար ժամանակ ՆԱՏՕ-ի փորձագետները պնդում էին, որ այդ հրամանի կատարման ոչ մի նշան չեն տեսնում:
Մոտավոր գնահատմամբ՝ Ռուսաստանն Ուկրաինայի հետ սահմանին կենտրոնացրել է մոտ 40 000 զինծառայող: