Այսօր, երբ Ուկրաինայի բնակչությունն առաջին անգամ անդքան միաձայն ընտրել է քաղաքակրթության արևմտյան ուղին, ողջ տարածաշրջանի համար վիթխարի նշանակություն է տրվում Ուկրաինայում բարեփոխումների հաջողությանը՝ հայտարարել է Վրաստանի նախկին նախագահ Միխեիլ Սաակաշվիլին: Այս մասին փոխանցում է Gruziya Online-ը:
Նրա խոսքով՝ վերջին տասնամյակի ընթացքում Վրաստանը մեծացրել է երիտասարդ բարեփոխիչների մի ողջ սերունդ, ովքեր կոչված են կիսվելու վրացական բարեփոխումների փորձով՝ օգնելու ուկրաինական կառավարությանը նոր Ուկրաինայի ստեղծման գործում:
«Սակայն ես մտադիր չեմ պաշտոնական դիրք զբաղեցնել: Մեր թիմը, մի քանի տասնյակ փորձառու վրացի բարեփոխոիչներն արդեն աշխատում են Կիևում և Ուկրաինայի այլ քաղաքներում»,- ասել է նա:
«Մենք արդեն աշխատում ենք կառավարության հետ միասնական հանրային ռեեստրի, էլեկտրոնային ռեեստրների, ինչպես նաև Արդարադատության տների ստեղծման ուղղությամբ: Մենք արդեն սկսել ենք աշխատել Կիևի նոր քաղաքապետի և Ուկրաինայի տարածաշրջանային առաջնորդների հետ: Ուկրաինական բարեփոխումների հաջողությունն այսօր ազատության մեծ հաղթանակ է նշանակում տարածաշրջանում: Իսկ դա կենսական կարևորություն ունի մեր՝ Վրաստանի համար»,- գրում է նախկին նախագահը: