Ֆրանսիայի խորհրդարանը վերջնականապես մարտի 19-ը` 1962-ի հրադադարի օրը, Ալժիրյան պատերազմի զոհերի հիշատակի ազգային օր հռչակելու մասին օրենք է ընդունել: Այս մասին հայտնում է france24.com պորտալը: Մարտի 19-ը հռչակվել է «Ալժիրում պատերազմի զոհերի և Թունիսում ու Մարոկկոյում ռազմական գործողությունների» հիշատակի օր, հայտնում է umma.org.ua-ն:
10 տարի առաջ Ֆրանսիայի Սոցիալիստական կուսակցությունն առաջին անգամ այս օրինագիծն առաջադրել էր խորհրդարանի քննարկմանը, սակայն այն ժամանակ այն լուրջ վեճեր էր հարուցել խորհրդարանականների շրջանում, որոնց մեծ մասը փորձել են թաքցնել Ֆրանսիայի գաղութային անցյալը:
Հիմա այս օրենքին լիովին կողմ են Ֆրանսիայի խորհրդարանի ձախ կուսակցությունները, որոնք կոչ են անում խոստովանել Ֆրանսիայի գաղութային անցյալի սխալներն ու հարգել Ալժիրում, Թունիսում և Մարոկկոյում ռազմական հակամարտությունների զոհերի հիշատակը: Սակայն UMP կուսակցությունը հայտարարել է, որ խորհրդարանն այս կերպ պատմությունն օգտագործում է իր նպատակների համար. օրենքն ընդունել են Ֆրանսիայի նախագահ Ֆրանսուա Օլանդի` Ալժիր պաշտոնական այցից մի քանի օր առաջ:
Le Monde ֆրանսիական թերթի հաղորդմամբ` Ալժիրի, Մարոկկոյի և Թունիսի վետերանների ֆրանսիական ազգային ֆեդերացիայի (FNACA, որը 350 000 անդամ ունի) ներկայացուցիչները դրականորեն են ընդունել օրենքի ընդունումը: Ավելի քան 40 այլ ասոցացիաների մոտ 1 մլն վետերան անդամներ հայտարարել են, որ Մագրիբում զոհվածների հիշատակը կշարունակեն հարգել դեկտեմբերի 5-ին, որովհետև մարտի 19-ն ընդամենը պատմական ամսաթիվ է, այլ ոչ Ալժիրում հրադադարի իրական ամսաթիվը:
Ալժիրի հեղափոխությունը կամ Ալժիրի պատերազմը տեղի է ունեցել 1954-1962 թթ.` ֆրանսիացի գաղութարարների և ալժիրյան ազատության համար պայքարող խմբավորումների միջև: Արդյունքում`Ալժիրն անկախացել է, Ֆրանսիայի գաղութարար իշխանությունները` տապալվել:
