Այս պահի դրությամբ Երևանի պետական համալսարան դիմել է 2200 դիմորդ: Այդ մասին տեղեկացնում է ԵՊՀ ընդունող հանձնաժողովի գլխավոր քարտուղար Վաչագան Գալստյանը՝ հավելելով, որ նախորդ տարվա համեմատ դիմորդների թիվը նվազել է 400-ով: «Դիմորդների թվով դրական կարող ենք համարել վիճակը «Ինֆորմատիկա և կիրառական մաթեմատիկա», «Կառավարում», «Լեզվաբանություն», «Միջազգային հարաբերություններ», «Իրավագիտություն» մասնագիտություններում»,- պարզաբանում է նա: Փոխարենը՝ բնագիտական ֆակուլտետներում, դիմորդների թվով պայմանավորված, վիճակը մտահոգիչ է: «Փիլիսոփայություն», «Հոգեբանություն», «Արվեստաբանություն», «Ռուսաց լեզու» մասնագիտություններով նույնպես շատ դիմորդներ չկան: Սա պայմանավորվում է նրանով, որ հանրակրթական դպրոցներ ավարտողների հոսքը մեծ չէ:
Մովսես Խորենացու անվան համալսարանի ռեկտոր Արթուր Աղաբաբյանը նկատում է դիմորդների թվի նվազում նաև մասնավոր բուհերում, ինչը մի շարք մարտհրվերների է հանգեցնում. «Եթե անցած տարի 57 դիմում կար, այս տարի 37 է: Մասնավոր բուհերի դեպքում որոշակի քանակից քիչ ունենալու դեպքում պարզապես հնարավոր չէ բուհը պահել:
Դիմորդների թվի նվազումը բանախոսները պայմանավորում են արտագաղթով, աշխատաշուկայի իրավիճակով: Ըստ բանախոսների՝ ամեն ինչ արվում է, որպեսզի ընդունելությունը հեշտ լինի: Օրինակ՝ ԵՊՀ-ում նույնիսկ մի շարք ֆակուլտետներում քննական բեռը թեթևացել է. առարկաներ են հանվել:
«ԵՊՀ-ում այս տարի հինգով կրճատվել է մասնագիտությունների թիվը, մեկով ավելացել: Թափուր տեղերի դեպքում կարող են պետական ավարտական քննական գնահատականով մասնակցել մրցույթին»,- պարզաբանում է Վաչագան Գալստյանը: Նույնիսկ մեկ առարկայով կարող են ընդունվել բնագիտական ֆակուլտետներ: Նախկինում մրցութային երկու առարկա է գործել՝ ֆիզիկա և մաթեմատիկա:
Հայ բանասիրության ֆակուլտետում հանվել է ընդունելության համար պարտադիր համարվող երրորդ առարկայից քննությունը՝ «Հայ ժողովրդի պատմություն» կամ օտար լեզու. հաշվի կառնվի ատեստատի գնահատականը: Իսկ այս ճանապարհն էլ, բանախոսները չհերքեցին, հանգեցնում է մի շարք խնդիրների՝ կապված բուհի տված կադրերի հետ:
Առավել մանրամասն ՝ տեսանյութում:
