Հանրային հատվածի ներկայացուցիչ, «Ժառանգության» ցուցակով պատգամավոր դարձած Թևան Պողոսյանը, պարզվում է, զգալի կարողության տեր է: Ինչպես «Առաջին լրատվական»-ը տեղեկանում է Բարձրաստիճան պաշտոնյաների էթիկայի հանձնաժողով ներկայացրած նրա գույքի և եկամուտների հայտարարագրից, 2012 թ. հոկտեմբերի 20-ի դրությամբ Թ.Պողոսյանն իր բանկային հաշվեհամարին ունեցել է 30 մլն դրամ, 23 հզ. 800 դոլար և 1000 եվրո գումար: Պողոսյանն անցած մեկ տարում աշխատավարձ է ստացել երկու աղբյուրից, բայց թե որ՝ պարզ չէ (հանձնաժողովն այդ տվյալները փակել է), և ընդհանուր տարեկան եկամուտները կազմել են 24 մլն 720 հզ. դրամ, այսինքն՝ ամսական մոտ 2 մլն 60 հզ. դրամ: Պատգամավորը հայտարարագրել է արժեթղթեր՝ 966 հզ. դրամ արժողությամբ (ընկերության անունը հանձնաժողովը փակել է), սակայն դրանցից ստացված եկամուտ չի նշված:
Թ. Պողոսյանն ունի երկու ավտոմեքենա՝ «ՎԱԶ 2106» և «Միցուբիշի GRANDIS» մակնիշների: Որպես անշարժ գույք Պողոսյանը հայտարարագրել է բնակելի տուն, հողակտոր և բնակարան, որոնց մակերեսի, գտնվելու վայրի վերաբերյալ և այլ տվյալները նույնպես փակ են: Անցած տարում Թ. Պողոսյանը ոչ մի նոր գույք ձեռք չի բերել:
Հայտնի է, որ նախքան պատգամավոր դառնալը Թ.Պողոսյանը Մարդկային զարգացման միջազգային կենտրոնի տնօրենն էր: Այդ կենտրոնը վայելում է իշխանությունների բարեհաճությունը և ոչ մեկ անգամ արժանացել է պետական դրամաշնորհների, որոնք պատահական անձանց չեն տրվում:
Ազգային ժողովում հանրային հատվածը ներկայացնող մեկ այլ պատգամավորի՝ Էդմոն Մարուքյանի ունեցվածքը շատ ավելի համեստ է. նրա բանկային հաշվեհամարներին այս տարվա հունիսի դրությամբ եղել է 1 մլն 686 հզ. դրամ, 990 եվրո և 36 դոլար: Մարուքյանն աշխատավարձ կամ դրան հավասարեցված վճար է ստացել 7 տեղից, ընդհանուր առմամբ՝ 3 մլն 72 հզ. դրամ կամ ամսական մոտ 256 հզ. դրամ, նաև ստացել է 850 եվրո հոնորար:
Է. Մարուքյանը որևէ փոխառություն կամ արժեթուղթ չի հայտարարագրել: Նա ունի 1 ավտոմեքենա՝ Honda CR-V 1999 թ., համատեղ սեփականությամբ 1 բնակարան (51.54 ք/մ մակերեսով)
Երկու պատգամավորն էլ չեն հայտարարագրել 8 մլն դրամը գերազանցող որևէ թանկարժեք գույք:
