Իրանական Mehr News լրատվական գործակալության փոխանցմամբ` Իրանի ԱԳՆ-ը հայտարարություն է տարածել, որում ասվում է, որ Իրանի միջուկային ծրագրի վերաբերյալ Մեծ Բրիտանիայի վարչապետ Դևիդ Քեմերոնի հայտարարությունն անհիմն է ու հակասում է ԱԷՄԳ-ի զեկույցներին.
«Բրիտանական վարչապետի անտրամաբանական հայտարարությունը վկայում է, որ Մեծ Բրիտանիայի ղեկավարությունն անտեսում է միջազգային օրենքներն ու Միջուկային զենքի չտարածման պայմանագրի հիման վրա պաշտոնապես ճանաչված երկրների իրավունքները:
Քեմերոնն անհանգստություն է հայտնում Մերձավոր Արևելքում սպառազինությունների մրցավազքի կապակցությամբ՝ չնայած որ Մեծ Բրիտանիան մշտապես զենք է արտահանում այդ տարածաշրջան: Նրա տարածաշրջանային այցն իրականացվում է այդ ծրագրի շրջանակներում:
Իրանի միջուկային խաղաղ գործունեությունն իրականացվում է միջազգային օրենքների շրջանակներում ու ԱԷՄԳ-ի դիտարկման ներքո: Իրանն իր բարի մտադրությունների անկեղծության ապացուցման համար առավելագույնս աջակցում է ԱԷՄԳ-ի հետ համագործակցությանը և կարծում է, որ նպատակամղված բանակցություններն ու կառուցողական փոխգործակցությունը չեն կարող այլընտրանք ունենալ:
Իրանի կառավարությունն ու ժողովուրդը մշտապես ընդգծում են, որ էքսպանսիոնիստական պետությունների պատճառով չեն հրաժարվի իրենց անքակտելի իրավունքներից»:
