Թուրքական Sabah թերթի փոխանցմամբ՝ թուրքական անվտանգության ուժերն այս տարի վնասազերծել են 716 PKK-ականի, որոնցից 75-ին՝ հոկտեմբերին: Այս մասին հայտնել են ռազմական աղբյուրները:
Վերջիններիս հաղորդմամբ՝ 2012 թվականի հունվարի 1-ից մինչև հոկտեմբերի 31-ն ընկած ժամանակահատվածում վնասազերծվել է 716 PKK-ական, որոնցից 496-ը սպանվել է, 21-ը գերի են ընկել վիրավոր վիճակում, 44-ը ձերբակալվել են, իսկ 155-ն էլ հանձնվել են:
2010 թվականին վնասազերծվել էր 431, իսկ 2011 թվականին՝ 694 PKK-ական: 2010 թվականին PKK-ի դեմ պայքարում իրականացվել է 13 միջին մասշտաբի օպերացիա, 2011 թվականին՝ 2 խոշոր և 38 միջին մասշտաբի օպերացիա, իսկ այս տարվա հաշվետու ժամանակահատվածում՝ 6 խոշոր և 19 միջին մասշտաբի օպերացիա:
Միջին մասշտաբի օպերացիա է համարվում այն օպերացիան, որին մասնակցում է 2-5 գումարտակ, իսկ ահա 6 և ավելի գումարտակով իրականացված օպերացիան համարվում է խոշոր մասշտաբի:
Հիշեցնենք, որ երեկ թուրքական անվտանգության ուժերի 9 հատուկ նշանակության գումարտակ F-16 կործանիչների աջակցությամբ ներխուժել էին Հյուսիսային Իրաք և Իրաքի տարածքում առաջ շարժվել 5 կիլոմետր, որից հետո վերադարձել էին թուրքական տարածք:
