Ինչպես ավելի վաղ տեղեկացրել էր «Առաջին լրատվական»-ը, Գուրջիևի անվան ժողովրդական նվագարանների համույթի (The Gurdjieff Folk Instruments Ensemble) Music of Georges I.Gurdjieff ձայնասկավառակն այս տարվա հոկտեմբերին ներկայացվել էր հոլանդական Edison Award հեղինակավոր մրցանակաբաշխությանը:
«Լավագույն ժողովրդական ալբոմ» անվանակարգում, որպես երաժշտական լավագույն նախագիծ, հաղթող է ճանաչվել Music of Georges I.Gurdjieff ձայնասկավառակը:
Հիշեցնենք, որ աշխարհում հրատարակված հարյուրավոր ձայնասկավառակներից այս անվանակարգում ներկայացվել էին երեքը։
Նշենք, որ Edison Award-ի մրցանակի են արժանացել Սթիվի Ուանդերը, Էրիկ Կլեպտոնը, Ռոբի Ուիլյամսը, դասական երաժիշտներից՝ Եվգենի Կիսինը,Վալերի Գերգիևը,Կլաուդիո Արաուն, իսկ մեր հայրենակիցներից` Շառլ Ազնավուրը:
Այս ձայնասկավառակը 2012 թվականին Հայաստանի «Ազգային երաժշտական մրցանակաբաշխության» ժամանակ ճանաչվել էր «լավագույն ժողովրդական ալբոմ»:
Գուրջիևի անվան ժողովրդական նվագարանների համույթի հիմնադիրը և գեղարվեստական ղեկավարն է Լևոն Էսկենյանը: Գուրջիևյան մեղեդիները նվագում է 2008 թ. նրա հիմնած Գուրջիևի անվան ժողնվագարանների համույթը, որի կազմում նվագում են Հայաստանի մի շարք լավագույն երիտասարդ երաժիշտներ։
Ձայնասկավառակը, որը հրատարակել է գերմանական ECM Records ձայնագրման հանրահայտ ստուդիան, արժանացել է արևմտյան հեղինակավոր բազմաթիվ պարբերականների (BBC Music Magazine, ABC, The Guardian, The Financial Times, The Independent, Mitteldeutsche Zeitung , NPR, L’Unita) ամենաբարձր գնահատանքին, իսկ բրիտանական Songlines Magazine հեղինակավոր պարբերականն այն ընդգրկել է աշխարհի լավագույն CD ալբոմների` նոյեմբեր-դեկտեմբեր ամիսների ցանկում:
Գուրջիևը ծնունդով գյումրեցի է, Ավետիք Իսահակյանի, Մերկուրովի ժամանակակիցը։ Գուրջիևը 20-րդ դարի աշխարհում ամենահայտնի փիլիսոփաներից է: Նա առաջիններից էր, որը Արևելքի մշակույթը ներկայացրեց Արևմուտքին, ինչն էլ մեծ ազդեցություն թողեց Փիթեր Բրուքի, Քեյթ Ջարրեթի, Բեռնարդ Շոուի, Քեթրին Մենսֆիլդի նման մտավորականների վրա։
Նրա երաժշտությունն աշխարհին հայտնի դարձավ Թոմաս դե Հարթմանի կողմից գրառված դաշնամուրային վերարտադրմամբ:
