Վրաստանի «Փոթի» նավահանգստի աշխատակիցները շարունակում են գործադուլը: Նավահանգստում օրեցօր ավելանում են կուտակված բեռները: Վրաստանի Արհմիությունների միավորումը բանակցություններ է վարում «Փոթի» նավահանգստի ղեկավարության հետ, որպեսզի նավահանգստի՝ գործադուլ հայտարարած աշխատողներին աշխատանքային նորմալ պայմաններ առաջարկվեն: Այս մասին երեկ «Առաջին լրատվական»-ին տեղեկացրեց միավորման նախագահ Իրակլի Պետրիաշվիլին:
«Փորձում ենք բանակցել, որ նավահանգստի ղեկավարությունն աշխատողների հետ ունենա մարդկային հարաբերություններ, ոչ թե ստրկական վերաբերմունք: Պետք է 7 տարվա ընթացքում այստեղ կուտակված խնդիրները շտկվեն»,- ասաց նա:
Պետրիաշվիլիի խոսքով, նավահանգստի ղեկավարությունը չի զիջում, խուլ ու համր է ձևանում: Արհմիությունների միավորման նախագահը չբացառեց, որ այս անգամ էլ իշխանությունները կարող են դիմել փորձված միջոցի և ոստիկանների միջոցով գործադուլավորներին վախեցնեն:
«Եթե փոփոխվի Աշխատանքային օրենսգիրքը և հանվեն 16-17-րդ դարերին բնորոշ ստրկատիրական կարգերը, չեն լինի նման գործադուլներ, և բանակցությունների արդյունքում հնարավոր կլինի հարցը լուծել: Սա կարևոր նավահանգիստ է ոչ միայն Վրաստանի, այլև հարևան երկրների համար: Ցավալի է, որ նման իրավիճակ է ստեղծվել, բեռները կուտակվել են, բայց պետք է աշխատանքային պայմանները փոխվեն»,- ասաց նա: «Փոթի» նավահանգստի կառավարիչը դանիական ընկերություն է: Իրակլի Պետրիաշվիլին տեղեկացրեց, որ Դանիայի համեմատ նրանք Վրաստանում անհամեմատ ցածր աշխատավարձ են տալիս նավահանգստի աշխատակիցներին: Մեր զրուցակցի փոխանցմամբ, աշխատանքային ժամերը շատ են, աշխատավարձերը՝ ցածր, աշխատակիցները չունեն հատուկ համազգեստ, նավահանգստում հակահիգիենիկ պայմաններ են:
