Թաիլանդում բանակը ռազմական հեղաշրջում է արել: Համապատասխան հայտարարությունը տեղի հեռուստատեսության եթերում արել է ցամաքային զորքերի հրամանատար, գեներալ Պրայուտ Չան-Օչան, հայտնում է ITAR-TASS-ը:
«Քաղաքական հակառակորդների միջև բանակցություններն արդյունք չեն տվել, իշխանությունը ժամանակավոր կառավարությունից անցնում է Խաղաղության և կարգի պահպանման հրամանատարությանը, որը ստեղծվել է երկրում ռազմական դրություն հայտարարելուց հետո»,- ասել է նա:
Զինվորականները ձերբակալել են քաղաքական ճգնաժամից դուրս գալու վերաբերյալ բանակցությունների մասնակիցներին, որոնք կազմակերպել էր բանակի հրամանատարությունը: Բանակցություններին ներկա են եղել հակակառավարական ցուցարարների, իշխանամետ «կարմիր վերնաշապիկավորների», ընդդիմադիր Դեմոկրատական կուսակցության և իշխող «Պիա Թայ» կուսակցության ներկայացուցիչները:
Թաիլանդական հեռուստատեսությունը հայտնում է, որ հանդիպման մասնակիցներն անհայտ ուղղությամբ տարվել են այնտեղից, որտեղ տեղի են ունեցել բանակցությունները:
Զինվորականների իշխանության անցնելու մասին հայտարարությունից հետո դադարել են աշխատել տեղական բոլոր հեռուստաալիքները: Նրանց եթերում ցուցադրվում է զինված ուժերի զինանշանը, երաժշտություն է հնչում:
Զինվորականներին իշխանության անցնելու մասին հայտարարությունից անմիջապես հետո Խաղաղության և կարգի պահպանման հրամանատրությունը հրաման է արձակել, որն արգելում է զենք կրել: Հրամանը վերաբերում է ոչ միայն շարքային քաղաքացիներին, այլև ոստիկաններին ու զինծառայողներին: Նրանք իրավունք ունեն զենք կրել միայն Խաղաղության և կարգի պահպանման հրամանատարության թույլտվությամբ:
Հիշեցնենք՝ մայիսի 20-ին Թաիլանդի բանակի հրամանատարությունը հայտարարել էր ռազմական դրություն սահմանելու մասին՝ երկրում «կարգուկանոնը և օրինականությունը պահպանելու» նպատակով:
