Ամերիկացի դերասանուհի Անջելինա Ջոլին հարցազրույց է տվել ABC-ի լրագրողներին, որում պատմել է ապագայի իր ծրագրերի մասին՝ ինչպես կարիերային, այնպես էլ ընտանիքին առնչվող:
Մասնավորապես, հոլիվուդյան աստղը հայտարարել է, որ դեմ չէ փորձել իրեն քաղաքականության մեջ: «Սակայն վստահ չեմ՝ ինձ այդ դերում լուրջ կընդունե՞ն, և կարո՞ղ եմ ես արդյունավետ լինել»,- ասել է նա: Նախկինում նա հերքել է քաղաքականությամբ զբաղվելու ցանկացած հնարավորություն, քանի որ կարծում է՝ իր անձնական կյանքի շատ մանրամասներ անընդունելի են հասարակության համար:
Հարցազրույցում նա ասել է. «Հետաքրքիր է՝ իմ պահարանում պահվող բոլո՞ր կմախքների մասին է արդեն հայտնի դարձել: Հավանաբար ամեն ինչ արդեն ջրի երես է դուրս եկել, այլևս ոչինչ չի մնացել»,- ասել է նա:
Դերասանուհին նաև պատմել է, որ Բրեդ Փիթի հետ հարսանիքի օրը դեռևս որոշված չէ, սակայն իրենք հաճախ են քննարկում այդ հարցը: Նա նշել է, որ քննարկումներից մեկի ժամանակ երեխաներից մեկն առաջարկել է հարսանիքին փեյնթբոլ խաղալ: «Գլխավորն այն է, որ երեխաների համար ուրախ լինի»,- կարծում է Ջոլին:
