Չնայած շատերը սպասում էին, որ «Ժառանգությունը» վայր է դնելու մանդատները, բայց մեկ էլ պարզվեց, որ վայր են դնում ընդամենը դանակ-պատառաքաղները, այն էլ ոչ բոլորը, այլ կուսակցության առաջնորդը` Րաֆֆի Հովհաննիսյանը:
Համենայն դեպս առայժմ միայն նա է հացադուլ հայտարարել, անժամկետ, և ըստ էության անպահանջ: Երեկ Ժառանգության հրավիրած բաց համաժողովի ժամանակ Րաֆֆի Հովհաննիսյանը հայտարարել է իր որոշման մասին և անմիջապես անցել դրա իրականացմանը, որը տեղի է ունենում Ազատության հրապարակում:
Րաֆֆի Հովհաննիսյանի այդ որոշումը անակնկալ է եղել նույնիսկ կուսակցականների համար: Ի՞նչ հարց է փորձում լուծել Հովհաննիսյանը դրանով: Դժվար է ասել: Համենայն դեպս ամենևին պատահական չէ, որ նա այդ քայլին է դիմում ընդդիմության` մարտի 17-ի հանրահավաքի նախաշեմին:
Արդյո՞ք Հովհաննիսյանը դրանով փորձում է խուսափել հանրահավաքին մասնակցելուց: Թե՞ պարզապես փորձում է ուշադրության մի մաս շեղել: Իսկ գո՞ւցե փորձում է հասարակական տրամադրությունները էլ ավելի խթանել:
Թեև շատ հավանական է, որ Րաֆֆի Հովհաննիսյանն ինքն էլ դեռ հստակ չի պատկերացնում իր ուզածը: Համենայն դեպս առնվազն անհասկանալի է, երբ բավական լուրջ հավակնություններ ներկայացնող քաղաքական գործիչը հացադուլ է հայտարարում երկրի համար մի այնպիսի պատասխանատու պահի, երբ հասարակությունը առաջնորդական հավակնություններ ներկայացնող գործիչներից գործողություններ, մտքեր, առաջարկներ, ծրագրեր, անելիք է ակնկալում, ոչ թե ինքնախարազանում, ինքնամեկուսացում:
Ագռավաքարի սինդրոմը, փաստորեն, մեր ժամանակներում դեռ շատ ակտուալ է, բայց բարեբախտաբար ոչ համատարած: Մինչդեռ թվում է, որ քաղաքական հասունության վկայությունը պետք է լինի հենց այդ սինդրոմի հաղթահարումը:
Համենայն դեպս դա է պահանջում հասարակության և պետության ծանրագույն վիճակի հանդեպ առողջ պատասխանատվության զգացումը: Թեև ինչ խոսք, ընդհանուր առմամբ, հատկապես այն բանից հետո, երբ ամիսներ առաջ նա մեկ որոշեց վայր դնել իր պատգամավորական մանդատը, իսկ հետո հետ վերցրեց այդ մասին դիմումն ու պահպանեց մանդատը, Րաֆֆի Հովհաննիսյանի որոշումներից թերևս զարմանալ պետք չէ:
Ու գուցե նաև պետք չէ փորձել հասկանալ նրա որոշումները: Պետք է երևի թե ընդամենը մարդկայնորեն առողջություն մաղթել Րաֆֆի Հովհաննիսյանին, մաղթել նրան կամք և համբերություն:
