ԱՄՆ-ում գրանցվել է մերձավորարևելյան կորոնավիրուսով (Middle East Respiratory Syndrome, MERS) վարակման երրորդ դեպքը: Այս մասին հաղորդել են Հիվանդությունների վերահսկողության ու պրոֆիլակտիկայի կենտրոնների ներկայացուցիչները:
Նրանց խոսքերով՝ վարակի նոր դեպքը գրանցվել է Իլինոյս նահանգում: Ի տարբերություն առաջին երկուսի՝ այն չի բերվել արտասահմանից: Հիվանդը այն ձեռք է բերել Սաուդյան Արաբիայից վերադարձած ԱՄՆ մեկ այլ քաղաքացու հետ շփումից: Հենց վերջինիս մոտ է մայիսի 2-ին ԱՄՆ-ում առաջին անգամ հայտնաբերվել այդ վիրուսը: Մայիսի 9-ին նրան դուրս են գրել հիվանդանոցից:
Ինչպես հաղորդել են բուժաշխատողները՝ այդ վիրուսով վարակված Իլինոյսի բնակիչը հիմա իրեն լավ է զգում և բժշկական օգնության կարիք չունի:
Վարակի երկրորդ դեպքը հայտնաբերվել էր մայիսի 12-ին՝ Ֆլորիդա նահանգում: Հիվանդը այն նույնպես ձեռք է բերել արտերկրում:
Առաջին անգամ վտանգավոր վիրուսը հայտնաբերվել էր 2012թ.-ին՝ Սաուդյան Արաբիայում: Ըստ մասնագետների՝ դրա առաջացման պատճառը կարող են լինել թերակղզու միասապատ ուղտերը:
