Անդրադառնալով մշակույթի նախարար Հասմիկ Պողոսյանի այն հայտարարությանը, թե իրենք Հայաստանի տարբեր մարզերից Երևան են տեղափոխում հուշարձանների բեկորներ՝ այսօր հրավիրված մամլո ասուլիսին «Արշավներ» ակումբի նախագահ Ռուբեն Բաղդիշյանը ասաց. «Հասմիկ Պողոսյանը հայտարարում է, թե ինքը Երևան է բերում բեկորները, այսինքն` ինքը հուշարձան չի տեղափոխում, այլ հուշարձանի մասնիկ է տեղափոխում: Ի՞նչ բեկոր: Երկու մետրանոց արձանը ինչպե՞ս կարող է բեկոր լինել: Եթե մենք Գոշի վանական համալիրից տեղափոխել ենք Պողոսի խաչքարը, ուրեմն դա դառնում է Գոշի թերի վանական համալիր:
Հայտարարում են, թե այդ հուշարձանները 600 մետր խորության ձորում, լքված վայրերում են: Կուզենայի այդ միտքը հայտնող մարդուն ասել` եթե Ք. ա. 3-րդ դարից գոյատևող այդ վիշապաքարը գոյատևել է մինչ օրս և չի կորցրել իր արտաքին տեսքը, ուրեմն դեռ երկար կգոյատևի, ու պետք չէ պաշտպանել, ուղղակի պետք է հոգ տանել:
Տուրիզմը զարգացնել չի նշանակում այն կենտրոնացնել Երևանում: Այն մարդիկ, ովքեր մշակույթի նախարարությանը խորհուրդ են տալիս, թե կարելի է այսպիսի ծրագիր մշակել, նրանք տուրիզմից անտեղյակ մարդիկ են: Առանց այն էլ Երևանը խիտ է, քաղաքը ռեզինից չէ, չի կարող մեծանալ: Եթե այդ մարդիկ չգիտեն, թե այդ հուշարձանները որտեղ են գտնվում, ապա դա չի նշանակում, որ դա թաքնված կամ լքված վայր է` ինչպես նրանք են հայտարարում:
Խորհուրդ կտամ, որ իրենք էլ գնան, տեսնեն, որ գոնե որոշումներ կայացնելուց հետո կարողանան ասել՝ այո՛, մենք գնացել, տեսել ենք` 600 մետր ձորի մեջ էր գտնվում, լքված վայրում էր: Բայց ինչպե՞ս կարելի է Գորիսի երկրաբանական ինստիտուտը լքված վայր համարել»:
Ասուլիսի մյուս բանախոսը՝ Armenian Extreme ակումբի նախագահ Գոռ Հովհաննիսյանը հուշարձանների տեղափոխման հետ կապված նույնպես իր դժգոհությունը հայտնեց.
«Իհարկե, շատ գովելի փաստ է, որ կառավարությունը ցանկանում է գեղեցկացնել մեր քաղաքի կենտրոնը, բայց ինչի՞ շնորհիվ: Տապանաքարը, խաչքարը տեղափոխելը նույնն է, ինչ ծառը արմատախիլ անես, ուրիշ տեղ տնկես: Մենք մշակութային առումով պարալիզացված ազգ չենք, մենք ունենք պոտենցիալ: Եկեք այդ գումարը տանք համապատասխան մասնագետների, թող իրենք կրկնօրինակը պատրաստեն, բերեն դնեն հրապարակում, և գրենք, որ սրա օրիգինալը գտնվում է այսինչ տեղում, մարդիկ էլ գնան տեսնեն: Այս դեպքում տուրիզմը կզարգանա: Իսկ նրանց արածը նույնն է, ինչ մարդու գլխին հարվածես` գլխացավն անցկացնելու նպատակով:
Մենք ուղղակի խնդրում ենք համապատասխան լուրջ մասնագետների հետ խոսեք և վերադարձրեք այդ հուշարձանները»,- եզրափակեց Հովհաննիսյանը:
