ԿԸՀ-ում դատական դեպարտամենտի երկու ներկայացուցիչներն այսօր կայացած ԿԸՀ նիստում ձեռնպահ քվեարկեցին Գեղարքունիքի մարզի Դարանակ համայնքում կայացած ընտրությունների վերաբերյալ ԿԸՀ ընդունած որոշմանը:
ՀՀ դատարանների նախագահների խորհրդի ներկայացուցիչ, ԿԸՀ անդամ Կարեն Փոլադյանը մեզ հետ զրույցում, պատճառաբանելով իր ձեռնպահ քվեարկելու հանգամանքը, նշեց. «Առարկություն չունեի, եթե ունենայի միանշանակ հանձնաժողովի նիստում կներկայացնեի: Կան իմ կողմից դեռևս չուսումնասիրված հարցեր, այդ պատճառով էլ քվեարկել եմ ձեռնպահ»:
Մեր հարցին, թե հանձնաժողովի նիստի ժամանակ ինչու չի բարձրաձայնել իր համար անհայտ հարցերի մասին` Փոլադյանը պատասխանեց. «Ինչը բարձրաձայնեի, ինձ համար չպարզված և դեռևս չուսումնասիրված հարցեր կային: Օրակարգում ընդգրկված հարցը մանրամասն չեմ կարողացել ուսումնասիրել»:
Փոլադյանը փաստեց, որ օրակարգում ընդգրկված հարցի վերաբերյալ տվյալները իրեն նախապես տրամադրվել են, բայց ինքը չի ուսումնասիրել:
ԿԸՀ ընդդիմադիր անդամ Զոյա Թադևոսյանը մեզ հետ զրույցում նշեց, որ ԿԸՀ անդամին հարիր չէ նման պատասխան տալը, որովհետև ԿԸՀ անդամը պարտավոր է իմանալ ինչ որոշում է կայացվում: