Հունաստանի վարչապետ Անտոնիս Սամարասը հայտարարել է, որ դժվար շրջանը, որում հայտնվել էր երկիրը, ավարտվում է և սկսվում է տնտեսական աճ:
«Մենք անցյալ չենք վերադառնա, հետդարձի ճանապարհ չկա: Ավարտվում է վարկատուների հետ հուշագրերի, զոհերի ու գործազրկության կենսաշրջանը»,- ասել է վարչապետը Սալոնիկում իր «Նոր ժողովրդավարություն» կուսակցության նախընտրական հանրահավաքի ժամանակ: Այս մասին փոխանցում է RIA Novosti-ն:
Նրա խոսքով՝ այդ դժվարին շրջանն ավարտում են Եվրախորհրդարանի առաջիկա ընտրություններն ու ՏԻՄ ընտրությունները: Նա հավելել է, որ այս տարի ճգնաժամի 6 տարիներից հետո առաջին անգամ կլինի տնտեսական աճ, և 2015-ին աճը կկազմի 2.9 տոկոս, 2016-ին՝ 3.7 տոկոս:
Պաշտոնական տվյալներով՝ գործազրկությունն արդեն սկսել է նվազել վերջին 3 ամիսներին: Նրա խոսքով՝ մինչև 2018 թվականը կստեղծվեն 550 հազար նոր աշխատատեղեր: Վարչապետի կարծիքով՝ մինչև 2020 թվականը գործազրկության մակարդակը ցածր կլինի միջին եվրոպական ցուցանիշից: Այժմ, երբ ձեռք բերվի բյուջեի առաջնային ավելցուկը, կառավարությունը կսկսի իջեցնել հարկերը, սակայն աստիճանաբար:
Նրա խոսքով՝ երեքշաբթի կներկայացվի մինչև 2020 թվականի տնտեսության զարգացման նոր ծրագիր:
