Թուրքական Doğan լրատվական գործակալության փոխանցմամբ՝ 97-ամյա ընդմիջումից հետո վերստին ղողանջել են Դիարբեքիրի Սուրբ Կիրակոս եկեղեցու զանգերը: Եկեղեցու վերանորոգման աշխատանքները մեկնարկել են 2010 թվականին և տևել են 2.5 տարի: Եկեղեցու վերանորոգման վրա ծախսվել է 1 միլիոն լիրա:
1915 թվականին հրետակոծության հետևանքով փլվել էր եկեղեցու զանգակատունը: Մոսկվայում պատրաստվել է 100 կիլոգրամ քաշով բրոնզե զանգ և բերվել Դիարբեքիր: 32-ամյա ընդմիջումից հետո երեկ եկեղեցին վերաբացվել է կրոնական արարողությունների համար, և մատուցվել է առաջին պատարագը:
Վերաբացված եկեղեցում առաջին պատարագը մատուցել է Պոլսո Հայոց պատրիարքի փոխանորդ Արամ արքեպիսկոպոս Աթեշյանը: Պատարագին մասնակցել են նաև Հայաստանից, ԱՄՆ-ից ու Կանադայից ժամանած հայեր:
Դիարբեքիրի Սուրբ Կիրակոս եկեղեցին կառուցվել է 1376 թվականին: Այն որպես հայկական եկեղեցի է ծառայել մինչև 1915 թվականը: Առաջին համաշխարհային պատերազմի ժամանակ այստեղ է տեղակայվել գերմանական շտաբը: Պատերազմից հետո եկեղեցին օգտագործվել է որպես բամբակի պահեստ: Նրա տարածքը կազմում է 3000 քառակուսի մետր:
