Երգիչ, երգահան, կինոդերասան Իգոր Վլադիմիրովիչ Տալկովը ծնվել է 1956 թվականի նոյեմբերի 4-ին` Տուլայի մարզի Գրեցովկա գյուղում: Նա ծագել է ազնվական արմատներ ունեցող ընտանիքից: Իգորի ծնողները բռնադատվածներ էին, ծանոթացել են կալանավայրում: Նրանց արտաքսել են Տուլայի մարզ՝ առանց դուրս գալու իրավունքի: Այս մասին հայտնում է Calend.ru-ն:
Տալկովը սկսել է երաժշտությամբ հետաքրքրվել վաղ մանկությունից: Սովորել է տեղի երաժշտական դպրոցում, տիրապետում է ակորդեոնին, կիթառին, ջութակին, թմբուկին և դաշնամուրին: Ավարտական տարիներին գլխավորել է դպրոցական երգչախումբը: 1973 թվականին նա գրում է իր առաջին ՝ Мне немного жаль ստեղծագործությունը: Դպրոցն ավարտելուց հետո անհաջող փորձ է արել` ընդունվելու Մոսկվայի թատերական ուսումնարան:
Սկսում է սովորել Տուլայի մանկավարժական ինստիտուտում, այնուհետև Լենինգրադի Կուլտուրայի ինստիտուտում, սակայն երկուսն էլ թողնում է: Մինչ մեծ բեմում հայտնվելը` նա հանդես է գալիս մի քանի անսամբլների հետ՝ Былое и думы, Фанты, Звёздочка:
1987 թվականին Դավիդ Տուխմանովի Чистые пруды երգը` Իգոր Տալկովի կատարմամբ, հայտնվում է «Տարվա երգ» հաղորդման մեջ, ինչից հետո Իգորը ձեռք է բերում լիրիկական երաժշտի հռչակ:
1980-ականներին նա գրում է Россия երգը, որի շնորհիվ երկիրն իսկապես ճանաչում է Տալկովին: Երգչին փառք բերած երգերի ցանկում են նաև Вернусь, Метаморфоза-2, Совки, Война, Бал сатаны, Дождь կատարումները:
1991 թվականի հոկտեմբերի 6-ին Տալկովին սպանեցին Սանկտ Պետերբուրգում` համերգի ժամանակ: Դեպքից մեկ տարի առաջ նա նկարահանվել էր За последней чертой ֆիլմում, որտեղ նրա հերոսը սպանվել է…
