Տնտեսական և սոցիալական հետազոտությունների թուրքական հիմնադրամը (TESEV) հրապարակել է Մերձավոր Արևելքի 16 երկրների հանրության կարծիքի արդյունքները, գրում է Hurriet-ը:
Ձևականորեն, միջոցառումը կոչվել է «Թուրքիայի ընկալումը Մերձավոր Արևելքում», իսկ փաստացիորեն հարցումը նվիրված է եղել ներկայիս քաղաքական իրավիճակին տրված մերձավորարևելյան պետությունների բնակչության գնահատականին:
Հարցման մասնակիցներից շատերը Թուրքիան համարել են «տարածաշրջանի գլխավոր քաղաքական ուժ», Սաուդյան Արաբիան` «գլխավոր տնտեսական ուժ», Իրանը` «գլխավոր ռազմական ուժ», Իսրայելը` «տարածաշրջանի և աշխարհի անվտանգության հիմնական սպառնալիք»:
Դրա հետ մեկտեղ, եթե 2011թ. հարցման մասնակիցների 78%-ը Թուրքիան դրականորեն էր ընկալում, ապա այս տարի այդպես է ընկալում միայն 69%-ը: Նման վերաբերմունքի հիմնական պատճառը «Արաբական գարունն» է և մասնավորապես սիրիական ճգնաժամը:
Հարցման մասնակիցների միայն 28%-ն է համոզված եղել, որ Բաշար Ասադի վարչակարգը տապալվելու է, իսկ 32%-ի կարծիքով` Ասադը կմնա իշխանության ղեկին, իսկ Սիրիային կայուն ապագա է սպասվում:
Հարցման արդյունքների համաձայն` նվազել է նաև «Արաբական գարնան» հեղինակությունը. եթե անցյալ տարի այն ողջունում էր հարցման մասնակիցների 60%-ը, ապա այս տարի` 47%-ը: Նվազել է նաև տարածաշրջանի պայծառ ապագային հավատացողների թիվը` 62%-ից մինչև 52%:
