ՄԱԿ-ի զարգացման ծրագիրը (UNDP) Հայաստանում սկսել է «Երիտասարդների առաջխաղացման արահետ» ծրագրի չորրորդ փուլը: Այս անգամ ծրագիրը ֆինանսավորում է Ամերիկայի հայ ավետարանչական ընկերակցությունը:
UNDP-ի այս ծրագրի ղեկավար Սևակ Ամալյանը «Առաջին լրատվական»-ին հայտնեց` այն անձանց, ովքեր ունեն բարձրագույն կրթություն, բայց չունեն աշխատանքային փորձ և այդ պատճառով դժվարանում են աշխատանք գտնել, «Երիտասարդների առաջխաղացման արահետ» ծրագիրը հնարավորություն է ընձեռում 6 ամիս աշխատանքային պրակտիկա անցնել Հայաստանի մի շարք ընկերություններում: Ըստ նրա՝ նախորդ 3 փուլերին մասնակցած քաղաքացիների մոտ 50%-ը պրակտիկայից հետո շարունակել է աշխատանքը տվյալ ձեռնարկությունում:
Պրակտիկանտներին տրվում է աշխատավարձ՝ ամսական 100 դոլարին համարժեք դրամի չափով՝ տրանսպորտային ծախսերը հոգալու համար:
Հարցին՝ կրոնական պատկանելությունը որևէ դեր ունի՞ մասնակիցների ընտրության հարցում, կամ նախորդ մասնակիցների ո՞ր մասն է եղել բողոքական, Ս. Ամալյանը պատասխանեց` ծրագրի նախորդ փուլերը ֆինանսավորել են այլ կազմակերպություններ, առաջինը` հենց UNDP-ն, նախորդը` Հայկական բարեգործական ընդհանուր միությունը (AGBU): Նա շեշտեց, որ ո՛չ բողոքական, ո՛չ կաթոլիկ, ո՛չ առաքելական լինելը գործոն չէ քաղաքացու` ծրագրին մասնակցելու համար:
