Հարյուրավոր նախկին պարագվայցի քաղբանտարկյալներ հանգուցյալ բռնապետ Ալֆրեդո Ստրեսների աճյունը հայրենիք վերադարձնելու դեմ բողոքի երթի են դուրս եկել:
Ցուցարարները բողոքում են «Ստրեսների ժառանգությունը վերականգնելու փորձի» դեմ կարգախոսներով:
Գեներալ Ստրեսներն իշխանության է եկել 1954-ին` ռազմական հեղաշրջման արդյունքում: Նա իրեն նախագահ է հռչակել և 30 տարի կառավարել Պարագվայը:
Ստրեսների ժամանակ պաշտոնապես գոյություն են ունեցել ժողովրդավարության նորմեր, սակայն փաստացի իշխանությունը եղել է նախագահի և նրա ղեկավարած կուսակցության ձեռքում, վարչակարգին դեմ մարդիկ պարբերաբար հալածվել են:
1989-ին Ստրեսները պաշտոնանկ է արվել մեկ այլ գեներալի կողմից: Նա 2006թ. մահացել է Բրազիլիայում, որտեղ նրան աքսորել էին:
Նախկին բռնապետի աճյունը հայրենիք փոխադրելու առաջարկը հնչել է նրա 100-ամյակի կապակցությամբ, որը նրա երկրպագուները պատրաստվում են նշել նոյեմբերի 3-ին:
