Երեկ կրկին ՀՀԿ գործադիր մարմնի նիստ էր հրավիրվել Բուզանդի 1/3 հասցեում գտնվող ՀՀԿ-ի Կենտրոն մասնաճյուղի գրասենյակում: Նորից ժամեր առաջ տարածքն արգելափակել էին, մեքենաների մուտքն արգելել և Վերնիսաժի տարածքում կայանված բոլոր ավտոմեքենաները տարհանել: Շենքի մուտքը փայլեցրել էին, ու բոլորը լարված սպասում էին ՀՀ և ՀՀԿ նախագահի ժամանելուն: «Հրապարակ»-ը գրում է, որ այս մարտական դրությունը համարձակվել էին խախտել միայն մի խումբ կանայք` Արամի 72-80 հասցեներում բնակարանների սպասող բնակիչները, որոնք խաբվել են կառուցապատողների կողմից:
Հիշեցնենք, որ նրանց բնակարանները մի քանի սեփականատերերի են վաճառվել, և հայտնի չէ, թե ինչպես է լուծվելու այս մարդկանց խնդիրը: Թեև քրեական գործեր են հարուցվել, և կառուցապատողները կալանավորված են, սակայն դա խնդրի լուծմանը չի նպաստում: ՀՀ նախագահին շրջափակելով` բնակիչները հույս ունեն, որ ճնշում կգործադրեն և իրենց բնակարանները կստանան: Այս անգամ ևս նրանք մարտական տրամադրությամբ էին ժամանել: Նրանք, մինչ նիստի ավարտը, այգում խմբված, բղավում էին` «մար-դա-սպան»: Շենքից դուրս գալով, Սերժ Սարգսյանը մոտեցավ կանանց: Բղավոցներն անմիջապես դադարեցին, և սկսվեց ջերմ-մտերմիկ զրույց: Նախագահն ասաց, որ զբաղվում են այդ հարցով, լուծումներ են փնտրում, ամեն ինչ կանեն, որ հարցը դրական հանգուցալուծվի: Միանգամից խաղաղված կանայք սկսեցին գոհունակության նշաններ ցույց տալ և անգամ գովեստի խոսքեր ասացին քաղաքապետի հասցեին, ով չի մերժում` իրենց ընդունում է:
