Կոռուպցիոն դրսևորումների մասին ՀՀ-ում գիտի յուրաքանչյուր քաղաքացի: Այս մասին «Առաջին լրատվական»-ի հետ զրույցում ասաց «Թրանսփարենսի ինթերնեշնլ հակակոռուպցիոն կենտրոն» հասարակական կազմակերպության նախագահ Սոնա Այվազյանն՝ անդրադառնալով կառավարության նիստի ընթացքում ՀՀ վարչապետ Տիգրան Սարգսյանի դիտարկումներին՝ ՀՀ-ում կոռուպցիայի դեմ պայքարի շուրջ:
Սոնա Այվազյանը հիշեց, որ ՀՀ-ն մշակել է առաջին հակակոռուպցիոն ռազմակավարական ծրագիրը, ՀՀ գործող նախագահ Սերժ Սարգսյանի օրոք՝ երկրորդ հակակոռուպցիոն ռազմավարական ծրագիրը, այսինքն՝ կոռուպցիայի առկայության մասին բոլորը գիտեին և շատ լավ հասկանում էին, որ լուրջ խնդիր է, գիտեին նաև, որ հասարակությունը կասկածի տակ է դնում դրա դեմ պայքարի արդյունավետությունը:
«Այսօր հանկարծ երկնքից իջել են, զարմացել, ատկատներից, անօրինականությունից, որ ինչ-ինչ գործընթացներ չեն աշխատում կամ ինչ–որ ատկատներ գոյություն ունեն, դատախազությունը պատշաճ կերպով չի իրականացնում իր լիազորությունները կամ կոծկում է հանցագործությունները: Մի քիչ զարմանալի է: Այն համընկնում է նախընտրական շրջանին, այդ պատճառով հնարավոր չէ պարզապես այս քայլերը չկապել ընտրությունների հետ և չասել, որ դա նախընտրական քարոզչության մաս է կազմում»,- իր կարծիքը հայտնեց Այվազյանը՝ ավելացնելով, որ այս գործընթացները հավատ առանձնապես չեն ներշնչում: Նրա պարզաբանմամբ՝ ցանկացած քաղաքացի հասկանում է, որ ինչպես նախագահը նշեց, որ գլխից է պետք բռնել, ձուկը գլխից է հոտում, առաջին հերթին այս երևույթները բարձր օղակներում են: Բայց, ըստ նրա, չկա քաղաքական կամք՝ բարձր օղակների դեմ պայքարելու, որովհետև այս իշխանությունը հենված է այդ օղակների վրա և չի կարող դրա դեմ պայքարել:
«Թրանսփարենսի ինթերնեշնլ»–ի նախագահի խոսքերով՝ նախագահն իրեն զերծ պետք է պահի այլ մարմինների իրավասությունների մեջ մտնելուց, ինքը պարզապես պետք է երաշխավորի, որ պետական կառույցները երկրում գործեն պատշաճ կերպով: «Նա չէ, որ պետք է որոշումներ ընդունի, թե այս կամ այն բանը սիրուն է կամ սիրուն չէ: Ինքն ունի իր իրավասություններին շրջանակը, այդ իրավասությունների շրջանակը պետք է իրականացնի, այդ թվում՝ լինի երաշխավորը երկրի արդարության, օրենքի գերակայության և կոռուպցիայի դեմ պայքարի»,- եզրափակեց իր խոսքը Սոնա Այվազյանը:
Հիշենենք, որ երեկ, բացելով ՀՀ կառավարության նիստը, վարչապետ Տիգրան Սարգսյանը տեղեկացրել էր, որ կոռուպցիայի դեմ պայքարն ուժեղացնելու վերաբերյալ զրույց է ունեցել ՀՀ նախագահի հետ: Վարչապետը նաև ասել էր, որ նախագահը վճռական գործողություններ է պահանջում, որպեսզի ապահովվեն շոշափելի և տեսանելի արդյունքներ։
