Հունաստանում կենսաթոշակային համակարգի բարեփոխումը, որը պահանջում են միջազգային վարկատուները՝ երկրին տրամադրվող ֆինանսական աջակցության դիմաց, կարող է հայտարարվել հակասահմանադրական: Այս մասին հաղորդում է Reuters-ը:
Դատական մարմինը, որն ուսումնասիրում է օրինագծերը մինչ խորհրդարանի կողմից քննարկումը, հայտարարել է, որ թոշակի անցման տարիքը երկու տարով բարձրացնելու՝ 67 տարվա հասցնելու և կենսաթոշակները 5-10 տոկոսով կրճատելու ծրագրերը կարող են հակասել երկրի հիմնական օրենքին:
Պաշտոնյաները նշել են, որ 2010-ի մայիսին ֆինանսական առաջին օգնության ստացումից հետո արդեն կենսաթոշակների 5-րդ նվազեցումը խախտում է մի շարք սահմանադրական դրույթներ, այդ թվում՝ անձի արժանապատվության և օրենքի առջև հավասարության սկզբունքները:
Նշվում է, որ հույն օրենսդիրները, որոնք պետք է կրճատումների հարցերը քննարկեն հաջորդ շաբաթ, կարող են արհամարհել ստուգումների որոշումը:
Իշխանությունները բարեփոխումներ են իրականացնում՝ ԵՄ-ից և ԱՄՀ-ից ֆինանսական աջակցության շարունակման համար՝ սեփական վճարունակությունը պահպանելու նպատակով: «Դատարանի կարծիքը պարտավորեցնող չէ Ֆինանսների նախարարության համար»,- Reuters-ին հայտնել է հաստատության պաշտոնյաներից մեկը՝ նշելով, որ դատարանը նման քննադատություն է հնչեցնում ոչ առաջին անգամ:
