«Ութ տարի շարունակ և՛ ես, և՛ մնացյալները բարձրաձայնում ենք այս մասին, փորձում պատկան մարմինների ուշադրությունը գրավել, որ հետևեն ոլորտին, որ փոխվի: Բայց առաջընթաց չկա: Լռել ևս չենք կարող»,- ասել է Սուրբ Հովհաննես եկեղեցու սպասավոր Տեր Շմավոն քահանա Ղևոնդյանը` հյուրընկալվելով «Հ2» հեռուստաընկերության «Խոսքի իրավունք» հաղորդմանը:
Նա խոսել է նոր ի հայտ եկած «Կենդանի հավատ» անվանումով կազմակերպության մասին` ասելով, որ այն աղանդ է, և թե այդ, թե մյուս կազմակերպությունների հարձակումների նկատմամբ իրենց սերունդը ամուր է, սակայն նոր սերունդը կարող է և շեղվել:
«Ցանկացած նոր գաղափարախոսություն չի կարող մեր ազգայինը սերմանել, քարոզել, քանի որ դրանք հայ հոգևորականի կողմից չեն ստեղծվել: Որևէ աղանդ Հայաստանում չի ծագել, այստեղ են գործում, բայց արևմտյան են: Ճյուղավորվում են և տարածվում: Փորձեք հասկանալ, թե նրանք որտեղից են գալիս, ով է նրանց հայրիկը»,- նշել է հոգևոր սպասավորը:
Նա նաև ասել է, որ Հայ Առաքելական եկեղեցին քրոզչության բոլոր միջոցներից էլ օգտվում է, կան հոգևորականներ, ովքեր իրենց կայքերով են քարոզչություն իրականացնում, համացանցում կա գրականություն և երաժշտություն: Միայն օնլայն պատարագ չեն անում: Հնարավորությունը կա, բայց չեն կարող դա անել, որովհետև առաջանահերթությունն իրենց համար կենդանի շփումն է: Աղանդների մասին էլ բարձրաձայնում են` հույս ունենալով, որ եթե պետությունը չլսի, ժողովուրդը գոնե կլսի:
