Reuters լրատվական գործակալության փոխանցմամբ՝ գնալով վատթարանում է թուրքական բանտերում հացադուլը շարունակող 700 քուրդ բանտարկյալների առողջական վիճակը: Այդ հացադուլը մեկնարկել է սեպտեմբերի 12-ին և արդեն ընթանում է 51 օր:
Նրանք շարունակում են հրաժարվել սննդից՝ փոխարենն ընդունելով վիտամիններ և շաքար: Այս կապակցությամբ իր մտահոգությունն է հայտնել Թուրքիայի գլխավոր բժշկական ընկերակցությունը՝ ընդգծելով, որ հացադուլավորների շրջանում մահացության դեպքերը կարող են սկսվել հաջորդ 10 օրերի ընթացքում, երբ նրանք կհատեն հացադուլի 60-րդ օրը:
Ընկերակցությունը հավելել է, որ հացադուլի 40-րդ օրվանից հետո մարդու առողջական վիճակի վրա հացադուլի բացասական հետևանքները սկսում են իրենց ավելի շատ զգացնել տալ:
Թուրքիայի վարչապետ Ռեջեփ Էրդողանը քրդերի այդ հացադուլն անվանել է «շոու»:
