Լիտվան սկսում է ԽՍՀՄ ՊԱԿ-ի արխիվային գործերի՝ աշխատակիցներ հավաքագրելու մասին գրանցման մատյանների հրապարակումը: Այս տվյալները կտեղադրվեն kgbveikla.lt կայքում:
Լիտվայի բնակիչների ցեղասպանության և դիմադրության կենտրոնի ուսումնասիրությունների արդյունքում ներկայացվել են տվյալներ 1669 գործակալների, տեղեկատվություն տվողների և ՊԱԿ-ի այլ գաղտնի աշխատակիցների մասին, որոնք հավաքագրվել են 1940-1979 թվականներին: Նշվում են մարդու անձնական տվյալները, կեղծանունները, հավաքագրման տարեթիվը, հավաքագրումը իրականացրած ստորաբաժանումը և գործի արխիվային համարը:
«Հայտնի չէ, թե ինչ նպատակի համար է ստեղծվել այս մատյանը: Արխիվային և այլ աղբյուրների ավելի մանրակրկիտ ուսումնասիրությունը պարզել է, որ հավաքագրվածների մի մասը որպես գործակալ չի աշխատել: Ենթադրվում է, որ նրանք համաձայնել են համագործակցել միայն չեկիստների ճանկերից փրկվելու համար: Չի կարելի նաև բացառել այն ենթադրությունը, որ այս մարդիկ ցուցակների մեջ են ընդգրկվել օպերատիվ նպատակների և վարկաբեկման համար»,- գրում է DELFI-ն:
Գրանցման մատյանի տվյալները կհրապարակվեն մաս-մաս. երկու շաբաթը մեկ՝ քսանական մարդու վերաբերյալ: