Ուկրաինայի Գերագույն ռադայի կողմից ընդունած որոշման համաձայն, մայիսի 25-ին կկայանան երկրի նախագահի, Կիևի քաղաքային խորհրդի և քաղաքապետի ընտրությունները: Ուկրաինայում դեռ դարեր առաջ հաստատված բազմահազար հայեր երկրի քաղաքական կյանքին մասնակցելու՝ ընտրելու իրավունք ունեն:
«Առաջին լրատվական»-ի հետ զրույցում Հայ Առաքելական եկեղեցու Ուկրաինայի թեմի առաջնորդ Տ. Գրիգորիս արքեպիսկոպոս Բունիաթյանն ասաց, որ իրականում ընդհանուր ազգաբնակչության մեջ մեծ հետաքրքրություն չկա ընտրությունների նկատմամբ: Նրա համոզմամբ՝ հայերը որևէ մեկ թեկնածուի վրա կենտրոնացած չեն: «Երևի կան մարդիկ, որոնք կունենան կողմնորոշում, բայց դա ընդհանուր տրամադրություն համարել չի կարելի: Քսան թեկնածու կա, որոնցից ժողովուրդը ճանաչում է մի քանի հոգու՝ 3-4: Մարդիկ կարծես ոչ էլ հատուկ պատրաստվում են այդ ընտրություններին: Շատ անորոշ վիճակում են, ժողովրդի մեծամասնությունն անտարբեր է դարձել ամեն ինչի նկատմամբ: Խաղաղություն է ուզում»,- ասաց նա:
«Առաջին լրատվական»-ի հետ զրույցում Դոնեցկի մարզային համայնքի ղեկավարի տեղակալ Վահրամ Խաչվանքյանն ասաց, թե անհամբեր սպասում են, որ ողջ Ուկրաինայում կարգուկանոն հաստատվի, քանի որ տարիներ հանգիստ, համերաշխ են ապրել, հայերին Ուկրաինայում շատ լավ են վերաբերվել, հայերի վիճակն այնտեղ միշտ էլ լավ է եղել: Հարցին, թե ի՞նչ կողմնորոշում ունեն հայերը Հարավարևելյան Ուկրաինայում, պատասխանեց, որ իրենք բոլորն Ուկրաինայի կողմնակիցն են:
«Մենք բոլորս ուզում ենք լինել Ուկրաինայի կազմում: Հանգիստ, համերաշխ մեր ժողովուրդն ապրել է երկար տարիներ, դարեր, ու ուզում ենք, որ ամեն ինչ վերականգնվի, նորից սկսենք ապրել հանգիստ ու խաղաղ, և այս օրերն ավարտվեն: Սպասում ենք ընտրություններին, տեսնենք՝ վերջն ինչ պետք է լինի, քանի որ դրանից շատ բան է կախված»,- ասաց նա՝ շարունակելով, որ 50 տարի է ապրում է Ուկրաինայում, ունի ընտրելու իրավունք և մասնակցելու է ընտրություններին:
Նա նշեց, որ հայերի մեծամասնությունն Ուկրաինայում ունի ընտրելու իրավունք: «Եթե ընտրությունները սկսվեն, հայերը սպասում են, որ գնան մասնակցեն, մենք այն թեկնածուի կողմից ենք լինելու, ով կարգուկանոն կհաստատի Ուկրաինայում: Իսկ թեկնածուները դեռ շատ են, դեռ տեսանելի չէ, թե ում կարելի է ընտրել: Ես չեմ կարող ասել, թե ում կընտրենք, պետք է դեռ կողմնորոշվենք »,- եզրափակեց իր խոսքը Վահրամ Խաչվանքյանը:
