«Ես որքան ուզում եմ հասկանալ՝ բյուջեն, փաստորեն, պակասել է։ Մասնավորապես՝ եթե հանում ենք եկամուտներից գնաճը, տնտեսական աճը և այն հսկայական գումարը, որ դուք ստանում եք եկամտահարկի հաշվին, բյուջեն պակաս է ստացվում։ Եթե աճ կա, որտե՞ղ է այդ աճը»,- այսօր ԱԺ մշտական հանձնաժողովների նիստում 2013 թ. բյուջեի քննարկման ժամանակ ֆինանսների փոխնախարար Պավել Սաֆարյանին նման հարց ուղղեց ՀԱԿ պատգամավոր Հրանտ Բագրատյանը։
Բագրատյանը նշեց, թե արտաքուստ 150 մլրդ դրամի աճ կա, բայց որտե՞ղ է այդ աճը՝ չի երևում։ Պատգամավորի խոսքով՝ վարչապետը «սոցիալական» բնութագրեց բյուջեն, բայց սոցիալական ծախսերը կրճատվել են. «Ի՞նչ իրավունք ունի»։
Պ. Սաֆարյանը պատասխանեց, որ քաղծառայողների աշխատավարձի աճը ՀՀ-ում երկու բաղադրիչից է բաղկացած, մեկը բազային աշխատավարձի մեծությունն է ՝ 40 հազ. դրամ, և կա երեք խումբ ու գործակիցներ, ըստ որոնց բնականոն ձևով են աճում աշխատավարձերը։ «Ակնհայտ է, որ գումարները ավելացել են»,- հայտարարեց փոխնախարարը՝ հավելելով, որ եթե 2012-ին պետբյուջեի եկամուտները 1 տրլն 44 մլրդ դրամ էր, հիմա եթե այս բյուջեն 107 մլրդ դրամի չափով է ավելանում, հարկային մուտքերը՝ 116 մլրդ դրամով, սակայն բյուջեի դեֆիցիտը պակասել է 51 մլրդով։ Այսինքն՝ կառավարությունը հնարավորություն է ունեցել լրացուցիչ բաշխել 64 մլրդ դրամ։
Հ. Բագրատյանը հակադարձեց, որ, փաստորեն, ցանկություն չկա խոշորին հարկել, իսկ չնչին ավելացումը ուղղվում է դեֆիցիտի կրճատմանը։ Այսինքն՝ ըստ Բագրատյանի, բյուջեն այն մասին է, որ մյուս տարի բոլորս 5% վատ ենք ապրելու։ Պատգամավորը հարցադրում արեց՝ կառուցվածքային սխալ չունե՞նք, որ այդքան ուղղում ենք դեֆիցիտի կրճատմանը, արդյոք կառավարությունը չի՞ շտապում։
Լուսանկարը՝ PanARMENIAN Photo-ի
