Դեռ սեպտեմբեր ամսին Գեղարքունիքի մարզի Վարդենիսի տարածաշրջանի Ծովակ գյուղում անասնագլխաքանակի շրջանում նկատվել էր արյան պարազիտային հիվանդություն: Այդ շրջանում գյուղատնտեսության նախարարությունը համապատասխան պայքար էր տարել, որի արդյունքում հոկտեմբերի սկզբին հիվանդությունն ինչ-որ կերպ բուժվել է: Սակայն արյան պարազիտային հիվանդությունը թուլացրել էր անասունների օրգանիզմի դիմադրողականությունը, որի արդյունքում կենդանիներից մեկի մոտ սիբիրախտի բացիլ էր հայտնաբերվել: Այս մասին այսօր լրագրողների հետ հանդիպման ժամանակ ասաց ՀՀ գյուղատնտեսության նախարարի առաջին տեղակալ, անասնաբուժական գիտությունների թեկնածու Գրիշա Բաղիյանը՝ խոսելով Գեղարքունիքի մարզում արձանագրված սիբիրախտ հիվանդության մասին:
Բանախոսը տեղեկացրեց, որ գյուղատնտեսության նախարարությունը շուրջ տասներկու հիվանդությունների դեմ պատվաստումներ է իրականացնում, որոնց թվում է սիբիրախտ հիվանդությունը: Ըստ Բաղիյանի՝ Գեղարքունիքի մարզի ամբողջ անասնագլխաքանակը դեռ մայիս ամսին պատվաստված է եղել:
«Մեկ կենդանու մոտ էր հայտնաբերվել սիբիրախտի բացիլ, որից հետո ամբողջ գլխաքանակը ենթարկվել է պատվաստման: Պատվաստումից հետո տասնչորս օր պետք է անցնի, սա է պատճառը, որ սահմանվել է կարանտին Գեղարքունիքի մարզի մի շարք գյուղերում, և մսեղիքի օգտագործումը վեց գյուղերում արգելվել է՝ կապված պատվաստման հետ: Արդեն տասնմեկ-տասներկուերորդ օրն է, Վարդենիսի տարածքում հիվանդ կենդանիներ չկան»,- ասաց բանախոսը՝ շարունակելով, որ համապատասխան բոլոր միջոցառումներն իրականացված են, բոլոր կենդանիներն անասնաբուժական զննման են ենթարկված, ուստի այսօրվա դրությամբ Հայաստանում չկա հիվանդ կենդանի:
Բաղիյանը հավաստիացրեց, որ անհանգստանալու ոչինչ չկա, հանրապետությունում չկան սուր դեպքեր, այնպես որ, այն պահանջները, որոնք դրվում են անասնաբուժական ծառայության կողմից, բնակչությունը միայն պետք է իրականացնի:
