ԱՄՆ-ը և Եվրամիությունը Բելգրադից չեն պահանջում ընդունել Կոսովոյի անկախությունը: Այս մասին հայտարարել են ԱՄՆ պետքարտուղար Հիլարի Քլինթոնը և եվրոպական դիվանագիտության ղեկավար Քեթրին Էշթոնը:
Նրանք համատեղ այցով Բելգրադում են, որտեղ բանակցություններ են ունեցել Սերբիայի նախագահ Թոմիսլավ Նիկոլիչի և վարչապետի հետ: Հանդիպումից հետո վարչապետ Դաչիչը, Քլինթոնը և Էշթոնը մամլո ասուլիս են տվել:
«ԱՄՆ-ը հակամարտող կողմերին կոչ է անում կիրառել գոյություն ունեցող համաձայնությունները և հստակ միջոցներ ձեռնարկել, որոնք կլավացնեն հարաբերությունները: Մենք Սերբիայից չենք պահանջում ընդունել Կոսովոյի անկախությունը, քանի որ հասկանում ենք սահմանադրական և քաղաքական խոչընդոտները»,- հայտարարել է Քլինթոնը:
Դրա հետ մեկտեղ` պետքարտուղարի խոսքերով` Կոսովոն ԱՄՆ-ի համար շարունակում է մնալ անկախ պետություն, որի սահմանները փոփոխության ենթակա չեն:
Իր հերթին Քեթրին Էշթոնը հայտարարել է, որ Սերբիայի ապագան տեսնում է ԵՄ-ում, սակայն դրա համար սերբերը պետք է բազում կարևոր բարեփոխումներ իրականացնեն:
Նրա գնահատմամբ` Բելգրադի և Պրիշտինայի երկխոսության փաստը և կողմերի միջև հարաբերությունների լավացումը չի նշանակի սերբերի կողմից Կոսովոյի անկախության ընդունում:
«Այդ երկխոսությունը չի նշանակում, որ մենք Սերբիայից պահանջում ենք ընդունել Կոսովոյի անկախությունը»,- նշել է Էշթոնը:
