ՀՀ Գլխավոր դատախազության կայքում որևէ տեղեկություն չկա երեկ նախագահ Սերժ Սարգսյանի հրավիրած խորհրդակցության մասին: Հիշեցնենք, որ Ս. Սարգսյանը Գլխավոր դատախազությունում հրավիրած խորհրդակցության ժամանակ խիստ քննադատության էր ենթարկել դատախազության աշխատանքը: Նախագահը հայտարարել էր, որ դատախազության նկատմամբ չկա վստահություն, որ դատախազության ներսում չկա լուրջ վերահսկողություն, չկա պայքար արատավոր երևույթների դեմ, չկա պայքար ստոր դատախազների դեմ, որոնք հանցագործին բացահայտելու փոխարեն, հովանավորում են նրան: Կարելի է ասել, որ Ս. Սարգսյանը, այդպիսով, դատախազներին, ինչու չէ` նաև գլխավոր դատախազ Աղվան Հովսեփյանին անուղղակիորեն հանցագործ էր անվանել:
Դատախազության կայքում, սակայն, այդ հանդիպման ու նախագահի հայտարարությունների մասին որևէ տող չկա: Փոխարենը կա տեղեկատվություն, որ Ա. Հովսեփյանը ծննդյան օրվա կապակցությամբ այցելել է հիվանդանոցում բուժվող դերասան Սոս Սարգսյանին կամ հանդիպել է մեծ Բրիտանիայի դեսպանին:
Գլխավոր դատախազի մամլո խոսնակ Սոնա Տռուզյանը «Առաջին լրատվական»-ի հետ զրույցում ասաց, թե նախագահի գործունեության վերաբերյալ դատախազությունը հաղորդագրություններ տարածելու իրավասություն չունի: «Նախագահի հայտարարությունները դատախազությունը չի մեկնաբանում: Իսկ տրված հանձնարարությունների կատարման ուղղությամբ ձեռնարկվող քայլերի մասին պարբերաբար կիրազեկենք»,-ասաց Ս. Տռուզյանը:
Տեղեկացնենք նաև, որ Գլխավոր դատախազության կայքը թարմացնում է, ոչ թե նախագահականը, այլ Գլխավոր դատախազությունը:
