Սերժ Սարգսյանն այցելելով Գլխավոր դատախազություն և բավական կոշտ քննադատության ենթարկելով դատախազության աշխատանքը` ըստ էության Աղվան Հովսեփյանի հանդեպ կիրառեց մտրակի և բլիթի քաղաքականություն:
Համակարգի գործունեության համար քննադատելով Հովսեփյանին` Սերժ Սարգսյանը փաստորեն նրան խրախուսեց Վարդան Օսկանյանի դեմ գործողությունների մասով: Սերժ Սարգսյանը հայտարարել էր, որ փողերի լվացման դեմ պայքարում դատախազությունը ձեռքբերումներ ունի: Այստեղ Օսկանյանի անունը չի նշվում, սակայն ակնհայտ է, որ Սերժ Սարգսյանը այս արտահայտությամբ իր հավանությանն է արժանացրել դատախազությանը Վարդան Օսկանյանի գործի առումով:
Սա նաև միաժամանակ նշանակում է, որ Սերժ Սարգսյանն առայժմ մտադիր չէ դադարեցնել այդ գործը, այլապես չէր անի խրախուսական արտահայտություն: Սա նշանակում է, որ նախագահական ընտրություններին ընդառաջ` Վարդան Օսկանյանի գործը դեռ կմնա օրակարգում` այսպիսով նաև ազդելով նախընտրական իրողությունների ձևավորման և քաղաքական ուժերի վարքագծի վրա:
Մյուս կողմից` Սերժ Սարգսյանն այսպիսով փաստորեն առաջին անգամ հրապարակավ ստանձնում է այս գործի պատասխանատվությունը, թեկուզ անուղղակի, բայց առաջին անգամ արտահայտվելով Օսկանյանի գործի կապակցությամբ: Եվ սա հատկապես հետաքրքրական է ԱՄՆ դեսպանի հայտարարությունների և ԲՀԿ-ին ու Օսկանյանին ցուցաբերած աջակցության ֆոնին: Սրանով Սերժ Սարգսյանը կամ ընդդիմանում է այդ գծին, բայց միևնույն ժամանակ էլ գուցեև ընդունում է խաղի կանոնները ՀՀԿ-ԲՀԿ դիմակայության, այսպես ասած, ֆորմալացման տեսքով:
Սարգսյանի այս պահվածքը հետաքրքրական է ՀՀԿ-ականների այն հայտարարությունների ֆոնին, համաձայն որոնց` եթե պարզվի, որ Վարդան Օսկանյանն անմեղ է, ապա պետք է պատասխան տան նրա դեմ գործ հարուցողները: Իսկ այստեղ առաջնային պլանում է Աղվան Հովսեփյանը, որովհետև չնայած գործը հարուցել է ԱԱԾ-ն, այնուամենայնիվ` հենց գլխավոր դատախազն է ներկայացրել Օսկանյանին մեղադրելու միջնորդությունը:
Այսինքն` Հովիկ Աբրահամյանի և Գալուստ Սահակյանի հայտարարությունները` եթե Օսկանյանը մեղավոր չլինի, պետք է պատասխան տան գործ սկսողները, առաջին հերթին հենց Աղվան Գառնիկիչին է վերաբերում:
Ըստ էության ստացվում է, որ Սերժ Սարգսյանը մի կողմից` կոշտ քննադատության է ենթարկում, մյուս կողմից` Աղվան Հովսեփյանին պաշտպանում է Հովիկ Աբրահամյանից և Գալուստ Սահակյանից կամ, այսպես ասած, ՀՀԿ-ից:
Չնայած միգուցե նա այսպիսով փորձում է դատախազին ցույց տալ, որ ինքը կարող է պաշտպանել նրան և կարող է թույլ տալ, որ ՀՀԿ-ն բզկտի նրան: Այսինքն` Սարգսյանը գլխավոր դատախազին ուզում է ցույց տալ, որ նրա ճակատագիրն իր ձեռքում է:
