Երևանի Սասնա Ծռեր փողոցի թիվ 2 հասցեում «էլիտար» շենքի շինաշխատանքները շարունակվում են: Հոկտեմբերի 25-ին այս շենքում, դեռևս չպարզված հանգամանքներում, բեռնատար վերելակը պոկվել և ընկել էր վերելակի հորանը: Դժբախտ պատահարի արդյունքում զոհվեց երկու մարդ, կան վիրավորներ: Արտակարգ իրավիճակների նախարարությունն արդեն հայտարարել է, որ բեռնատար ինքնաշեն վերելակը գրանցված չէ ԱԻՆ ռեեստրում և չի անցել փորձաքննություն: Դեպքի առթիվ ոստիկանությունը հարուցել է քրեական գործ, ընթանում է նախաքննություն:
Չնայած սրան` շենքի շինաշխատանքները նույն թափով շարունակվում են: Շենքի սեփականատիրոջ անունն աշխատակիցները թաքուն են պահում:
«Առաջին լրատվական»-ը փորձեց տեղում պարզել, թե ինչո՞ւ վերելակը գրանցված չէ ԱԻՆ ռեեստրում, և ինչո՞ւ շինաշխատանքներ իրականացնող ընկերությունը չի հետևել անվտանգության տարրական նորմերին: Մեզ տեղեկացրին, որ շենքի սեփականատերը տարածքում չէ: Շինարարական աշխատանքներ իրականացնող խմբի ղեկավարը, ով ներկայացավ որպես տեխնիկական հսկողություն իրականացնող անձ, չպատասխանեց մեր հարցերին՝ նշելով, որ կատարվող հետաքննությունը կտա բոլոր հարցերի պատասխանը:
Ավելին` նա արգելեց նկարահանել վերելակն ու տարածքը՝ նշելով, որ դա սեփական տարածք է: Ի դեպ, շենքի տարածքում չկա շինարարական ցուցանակ, որից պարզ կլինի, թե որ ընկերությունն է իրականացնում շինաշխատանքները:
Հետաքրքիր է, որ այսքանից հետո, չսպասելով նախաքննության ավարտին և առանց դժբախտ պատահարի հանգամանքները բացահայտելու, իրավասու մարմինները անարգել թույլ են տալիս շարունակել շենքի շինաշխատանքները:
