Սլավյանսկում Ուկրաինայի ֆեդերալացման կողմնակիցները պատրաստ են իրենց կողմից պատանդ վերցված ԵԱՀԿ միջազգային դիտորդներին փոխանակել աշխարհազորայինների հետ, որոնց ձերբակալել են Կիևի իշխանությունները: Այս մասին Սլավյանսկի «ժողովրդական քաղաքապետին» մեջբերելով՝ հաղորդում է Reuters գործակալությունը:
Նա ավելացրել է, որ ԵԱՀԿ դիտորդները նորմալ վիճակում են՝ բացառությամբ մեկի, ով տառապում է շաքարախտով: Պոնոմարյովը նշել է նաև, որ նրան բժշկական օգնություն է ցուցաբերվել:
Ընդ որում, «ժողովրդական քաղաքապետի» խոսքով՝ միջազգային դիտորդներին ազատ արձակելու վերաբերյալ հարցը ռուսական իշխանությունների հետ չի քննարկվել:
Ավելի վաղ հաղորդվում էր, որ Եվրոպայի անվտանգության և համագործակցության հարցերով կազմակերպությունը բանակցողների թիմ է ուղարկել Ուկրաինա, ովքեր կփորձեն ազատել դիտորդներին: Վերջիններս ապրիլի 25-ին պատանդ են վերցվել Սլավյանսկի աշխարհազորայինների կողմից:
