Եվրախորհրդարանի 5 անդամների՝ Իրան պլանավորելիք այցը չեղյալ է հայտարարվել ԵՄ բարձրագույն ղեկավարության որոշմամբ:
Ինչպես այսօր տեղեկացնում է բրիտանական BBC ռադիոընկերությունը, այցը չեղյալ հայտարարելու պատճառը Սախարովի անվան մրցանակի դափնեկիրների հետ հանդիպում կազմակերպելու իրանական իշխանությունների մերժումն է:
«Մենք արդեն պատրաստ էինք Իրան թռչել, երբ զանգ ստացանք Իրանի դեսպանությունից ու մեզ հայտնեցին, որ Սախարովի անվան մրցանակի դափնեկիրների հետ հանդիպում չի լինի»,- հայտարարել է պատվիրակության ղեկավար, Եվրախորհրդարանի պատգամավոր Տարյա Կրոնբերգը:
Հիշեցնենք, որ երեկ Եվրախորհրդարանը Սախարովի անվան մրցանակ շնորհեց իրանցի կինոռեժիսոր և սցենարիստ Ջաֆար Փանահին ու նրա հայրենակցուհի՝ իրավապաշտպան Նասրին Սոտուդեխին: Մրցանակը շնորհվում է իրավապաշտպան գործունեության ոլորտում ձեռքբերումների համար:
Իրան կատարելիք այցի ժամանակ եվրախորհրդարանականները պատրաստվում էին հանձնել դափնեկիրներին համապատասխան փաստաթղթերը մրցանակ ստանալու վերաբերյալ: Սպասվում էր, որ պատվիրակությունը Իրան կժամանի հոկտեմբերի 28-ին ու այնտեղ կմնար մինչև նոյեմբերի 2-ը: