ՀՀ կրթության և գիտության նախարար Արմեն Աշոտյանն այսօր ընդունել է Հայաստանում Սիրիայի Արաբական Հանրապետության գործերի ժամանակավոր հավատարմատար, լիազոր նախարար պարոն Աբդուլ Համիդ Սալլումին:
Անդրադառնալով կրթության և գիտության բնագավառին` նախարար Աշոտյանը նշել է, որ երկկողմ համագործակցությունն արդյունավետ զարգանում է` մասնավորապես ընդգծելով Հալեպի համալսարանում բացված հայագիտական կենտրոնի գործունեությունը, որը ներուժ ունի դառնալու երկու ժողովուրդների բարեկամության ու գիտական համագործակցության լավագույն օրինակ:
ՀՀ բարձրագույն մասնագիտական կրթության համակարգում իրականցվող բարեփոխումների համատեքստում` նախարարն անդրադարձել է նաև կրթության որակի ապահովման առումով նախկինում արձանագրված սիրիացի ուսանողների և ոչ պետական որոշ բուհերի հետ կապված հիմնախնդրներին, նշելով, որ դրանք հիմնականում ստացել են իրենց լուծումները:
Աշոտյանը հույս է հայտնել, որ նախարարության և ՀՀ-ում Սիրիայի Արաբական Հանրապետության դեսպանատան համագործակցությունը կուղղվի նաև սիրիացի ուսանողների շրջանում ՀՀ բարձրագույն ուսումնական հաստատությունների հեղինակության ու գրավչության բարձրացմանը: Նախարարը նշել է նաև, որ Սիրիայի բարձրագույն կրթության նախարար, դոկտոր Ղիյաս Բարաքաթի նախատեսվող այցելությունը հիմքեր կստեղծի հայ-սիրիական գիտակրթական հետագա համագործակցության զարգացման համար:
Աբդուլ Համիդ Սալլումն էլ իր խոսքում կարևորել է այսօր հայ համայնքի մասնակցությունը երկրի սոցիալ-տնտեսական ու կրթամշակութային կյանքում, որն էլ իր հերթին երկու երկրների միջև կամուրջ է հանդիսանում համագործակցության զարգացման համար:
Հանդիպման ընթացքում քննարկվել են նաև Սիրիայի բարձրագույն կրթության նախարարի նախատեսվող այցի հետ կապված այլ հարցեր: